Esnan cu ta forma parti di e economia informal ta bay inicia trayecto di integracion di Imigracion

Minister Cicilia a anuncia e proceso di regulacion

ORANJESTAD (AAN):  Minister mr. Wendrick Cicilia tabata invitado na e Asamblea General di Aruba Food and Beverage Association, den cual e mandatario a comparti diferente perspectiva y pensamento riba e maneho di turismo y labor. Ademas, Minister Wendrick Cicilia tabatin oportunidad pa splica con ta atende cu e retonan cu ta presenta. 

Importancia den colaboracion

Minister mr. Wendrick Cicilia a subraya e importancia di tin bon colaboracion entre sector publico y sector priva, unda cu Gobierno y sector priva ta uni forsa pa yega na solucion. AFBA ta keda un stakeholder importante pa e maneho di turismo y labor. E presencia di e minister na e asamblea general ta reconfirma su sosten na e relacion publico y priva cu a existi pa hopi aña caba.

E liña di e mensahe di Minister Cicilia ta cu e ta continua cu e colaboracion aki y ta consider’e uno importante. E preocupacionnan di e sector di horeca y hospitalidad tin e atencion di minister y e ta comprometi pa tuma pasonanan concreto pa soluciona e preocupacionnan aki. 

Turismo cu ta contribui

Durante su presentacion, Minister Cicilia a expresa cu nos mester tin un cambio den perspectiva di con nos ta mira y percibi turismo di Aruba. Kier mira Aruba como industria y como un modelo pa promove a bon comun di comunidad, eleva e calidad y experiencia di bida di nos hendenan, genera oportunidad y tambe promove emprendimento di nos hendenan.

“Nos kier mira un turismo cu ta contribui na conserva locual ta e factornan cu ta haci Aruba importante; nos medio ambiente y nos naturalesa. Ademas nos kier resalta nos herencia cultural den e maneho di turismo”, asina Minister Cicilia a expresa.

            Un di e temanan presenta tabata e scarsedad laboral cu tin den e industria. E prome paso tabata pa pospone e Arbeidsmarkttoets na DPL. E desicion aki ya caba tin efectonan positivo den e industria. 

Lo inicia cu regulacion

A tuma e oportunidad pa duna un primicia durante e Asamblea General di AFBA. Minister Cicilia a anuncia e proceso di regulacion. Tur esnan cu ta forma parti di e economia informal ta bay inicia cu un trayecto di integracion di Imigracion pa formalisa esnan cu no tin un status legal pero si ta formando parti di economia informal.

Cu e cambio aki nan por tin proteccion di e leynan laboral y alabes contribui cu finansas publico. Tambe lo por yuda alivia e scarcedad di empleado cu tin na e momentonan aki. Minister Cicilia conhuntamente cu sector priva lo sigui tuma decision pa alivia e preocupacionnan existente.