En busca di e contesta pa alivia un pena enorme di comunidad
- Cada crimen ta costa victima y comunidad gastonan enorme
- Criminal mester paga pa su estadia den prison cu trabao gratis
ORANJESTAD (AAN): Diariamente publico ta worde informa di incidentenan criminal, cu mester produci placa of otro tipo di bienestar pa e criminal.
Na e momento cu un persona comete un acto criminal, e ta afecta por lo menos un miembro di comunidad pero pio ainda henter e comunidad, si e worde gara y persigui como criminal.
E necesidad di un codigo penal cu ta dicidi con ta castiga un persona cu ta viola ley, cu pa e hecho cu e ta trapa riba ley ta afecta bida di un ser humano, cu por ta ciudadano of bishitante, pero tambe directamente henter e pais.
Criminalidad ta uno di e factornan cu cual mas cuenta ta worde teni den tur loke por trece bienestar pa e pais manera proyectonan nobo di inversionistanan extranhero cu kier inverti den Aruba mescos cu e trankilidad di e ciudadano cu mester di un bida trankil pa e por cumpli na su turno cu su debernan enfrente su pais.
E cifra di criminalidad ta importante pa turismo pero tambe e ta un problema inmediato y serio pa e Arubiano, cu pa motibo di criminalidad mester haci gastonan importante pa e garantisa su seguridad.
Cambionan serio a presenta den e comportacion di poblacion mundial, cu a deshaci di balornan sumamente importante y den cual hasta por conclui cu e hende cu no tin berguensa di su actonan y solamente ta mira placa y posicion, finalmente ta bira triunfador como hende “sabi” pa logra su metanan personal.
Historia humano ta duna prueba cu castigo ta e unico arma efectivo for di momento cu Adam y Eva a come e appel prohibi cu mescos cu e paraiso no tabata nan propiedad y cu a adverti nan pa no horta.
E nocion di berguensa, cu tabata evita criminalidad tambe ya cu hende tabata tin berguensa di worde contempla door di comunidad a base di nan comportacion, sufri cambio grandi.
Mas y mas resultadonan mundial ta duna hende e prueba, cu e bon ladron no ta esun cu ta arepenti pero esun cu ta capaz pa orkestra ladronicia di pertenencianan di comunidad of otro miembronan di comunidad.
Na Aruba criminalidad directamente ta bira gastonan pa Pueblo, cu mester paga henter un aparato pa evita y pa castiga criminalidad y asina abuso contra e pais of ciudadanonan cu ta bira victima.
Aruba mester inverti continuamente den un mihor aparato di prevencion y accion legal contra criminalidad, cu den un mundo di ciencia avanza, cada rato ta crece.
Aruba ta paga pa aumento di crimen no solamente den caso di e ladron cu ta bula muraya y drenta cas di otro, pero tambe e ladronnan di nivel mas halto cu tambe tin e mihor armanan pa practica ladronicia.
Ladronicia ta perhudica hende. Ladronicia ta horta bienestar y trankilidad di Pueblo.
Ladronicia no ta solamente asunto di placa, pero tambe a bira ladronicia di bida y bienestar di ciudadanonan.
Tur hende ta repudia crimen, pero placa di belasting di tur hende mester yuda pa e criminal ricibi trato di acuerdo cu tur tipo di derecho humano ora e cay den man di autoridad na Aruba, cu ta parti di e paisnan liber y democratico na mundo.
Cuanto placa di Pueblo ta worde uza pa garantisa cu e criminal por come mes tanto of mas tanto pan cu tanto mucha pober, cu ta bay school sin desayuno.
Cuanto placa di Pueblo ta bay pa hasta e colchon pa e preso por drumi mientras comunidad tin problema pa drumi den e peligernan di criminalidad creciente, cu hasta ta amenaza economia?
E momento a yega pa cuminsa atende serio cu un mundo, cu a perde berguenza. Un mundo di hende sabi cu ta maestro den yena nan saco cu placa pa nan haya poder, cu cada rato ta bira mas cuestionabel den un mundo cu tin problema serio pa realiza ainda kico ta poder segun consenshi y di cual hende por ta orguyoso.
Nos a discuti e asunto aki cu basta persona pa sondea opinionnan y mas y mas por nota e exigencia pa criminalidad no habri porta pa un “cuarto gratis” manera prison ta worde yama pero pa prison bira un lugar den cual e preso ta traha pa e haya placa pa su estadia.
Aruba conoce hopi trabao pa cual ta dificil pa haya trahador. Den cooperacion cu tur instancia cu ta respeta e base humano, mester haci husticia awor cu Aruba y exigi pa criminal cu kier a horta prestacion y logro di otro, bay traha gratis pa e comunidad, cu awor mester produci placa pa paga estadia di un persona den prison.
E “cuarto gratis”oficialmente mester bira “cuarto paga” cu trabao pa comunidad.
E asunto di traha gratis pafor di prizon, no ta suficiente pa baha criminalidad sigur si ya e criminal en cuestion, no tabata traha pa e biba.
Ora haci un resumen di valornan di comunidad moderno, claramente mester papia di un caida di loke ta worde considera “valor”y palabranan manera “honor” a worde reemplaza cu probechador di oportunidad.
Nos leynan mester atende cu cambio di mentalidad pa keda husto pa Pueblo, cu mester di medida pisa, pa evita cu abusador ta bira rey y ta destrui e paraiso construi den decencia!
