ORANJESTAD (AAN): Crisis Team y Departamento di Salud a informa cu 6 persona a recupera. Mientrastanto a registra un total di 13 caso nobo di Covid-19, di cual tur ta residente.
E cantidad total di testnan ehecuta diamars na e diferente localidadnan na Aruba, entre otro laboratorio di hospital, laboratorionan priva y aeropuerto ta 409 test.
'Positivity rate' entre residentenan ta 12%.
Casonan activo ta 54 (45 residente). E cantidad di fayecido relaciona cu Covid-19 ta 107.
DIARIO a haya algun pregunta di parti di personanan den comunidad cu a expresa nan preocupacion relaciona cu un aumento den e casonan nobo.
Ta pensando cu e aumento aki lo tin involucra personanan cu no a vacuna contra Covid-19.
DIARIO no a haya esaki confirma oficialmente door di Departamento di Salud, pero parce cu en general esey lo ta por ta e caso y cu e personanan cu no a vacuna lo por ta esnan cu ta contagiando cu Covid-19 den e dianan aki, mescos cu ta sosodiendo na Sint Maarten y na otro paisnan rond mundo.
