ORANJESTAD(AAN)— Aruba ta bay eleccion cu un pakete sumamente revelador di loke Pueblo a descubri despues di cambio di Gobierno na 2017.
Ta despues cu Aruba a conoce un Gobierno nobo, hopi asunto cu a keda scondi, a rementa riba practicamente tur asunto cu ta den man di Gobierno.
Cu permiso cu a wordo otorga durante e gobierno di Mike Eman no a bay segun regla, tabata conoci na 2017 ora durante temporada di gobernacion autoridad a actua contra Paul Croes, cu a wordo condena na castigo di prison dor di Hues y awor ta bay apela su veredicto.
Paul Croes tabata un miembro integral di Gabinete Mike Eman y sigur den e desaroyonan pa atrae Citgo, a hunga un papel importante ya cu mester a duna permiso pa entrada y salida di Aruba.
E caso Paul Croes ta conoci pa publico di Aruba, cu awe ta cera conoci cu un caso, cu DIARIO for di 2018 a adverti mester ta parti di investigacion, cu ta desaroyonan den Refineria di Aruba cu atraccion di Citgo contra reglanan di Aruba.
Gobierno Mike Eman a haci tur loke e tabata por, contra ley, pa pasa e Acuerdo cu Citgo den cual e compania cu el a lanta Refineria di Aruba, a hunga un papel central.
Awe e rapport forensico cu DIARIO a studia y mester sigui studia, ta den man di Ministerio Publico. DIARIO ta trata di haya tempo pa studia pagina pa pagina di un rapport cu ta splica puntonan importante den e maneho di e Refineria di Aruba cu ta realmente directamente mara na e loke a pasa cu Citgo na Aruba y cu mester bini na cla tambe manera for di 2018 a splica.
Aruba ta para dilanti un eleccion, den cual un gobernacion cu a baha na 2017, mester contesta pregunta serio di Pueblo.
For di 2017 Mike Eman, cu tabata lider di e Gobierno Mike Eman, cu awe ta forma un parti dudoso den gobernacion di Aruba, no tabata presente pa splica Pueblo kico el a haci cu Aruba.
Awe Mike Eman mester habri su boca y sea basta homber pa bisa Pueblo kico a pasa cu propiedad y placa di Pueblo.
Benny Sevinger ta den prison pa responde autoridad loke el a haci cu tereno di Aruba. Pero tereno di Aruba ta forma parti di Infrastructura di e pais, cu tabata directamente e base di e proyectonan Bo Aruba, proyectonan introduci y dirigi dor di Mike Eman personalmente.
Segun rapport di Algemene Rekenkamer Aruba tabata Mike Eman cu tabata reuni cu Benny Sevinger pa despues di su contactonan den bario (politicoi???) ahusta e placanan di Aruba cu tabata wordo gasta.
Pa por a realisa mayoria di e proyectonan mester a atende cu tereno. Proyecto di tram, proyecto di brug, proyecto Watty Vos Boulevard, ban sigui, tur tabata tin mester di transaccion di tereno y Benny Sevinger y Mike Eman sigur mester a haci uzo di e personal cu awe ta wordo persigui dor di Husticia den e caso di tereno.
Con Benny y Mike a atende cu tereno a base di e proyecto Bo Aruba den cual a gasta mucho mas cu a wordo planifica dor di e structuta cu Mike Eman a inventa?
Benny mester a atende asunto di tereno cu Mike Eman si hunto nan a ehecuta rapport Bo Aruba. Nos no ta acusa Mike Eman di nada, pero si nos ta di opinion cu Pueblo mester haya bista den tur loke a pasa cu compra di tereno pa por a realisa e proyectonan di Bo Aruba y tur hende cu a ricibi placa den e proyectonan aki.
Aruba mester acepta un pagina scur den su historia. Un pagina di mal gobernacion, di abuso di placa di Pueblo, di abuso di propiedad di Pueblo manera nunca den historia Aruba a pensa di por a conoce.
Mike Eman no por ta hunga angelito y pidi Pueblo pa e bolbe como Prome Ministro mientras como cobarde un politico tabata tin motibo di sconde pa Pueblo, manera a pasa cu Mike Eman despues di 2017 ora su gobierno a spat den su cara y holor desagradabel a yena aire di Aruba.
