ORANJESTAD (AAN) – Minister di Finanzas, Economia y Cultura, Xiomara Maduro, a elabora tocante subsidio di salario den conferencia di prensa di gobierno,
Diaranzon di e siman aki. Esaki den cuadro di e ayudo di likidez cu gobierno ta pendiente di haya for di Hulanda na Juni awo, den e siguiente tranche.
Minister Maduro a señala cu desde Mei 2020, Gobierno di Aruba ta brindando subsidio di salario pa por contraresta e efecto economico cu e crisis di Covid-19 a trece cune.
“Gobierno di Aruba ta brindando subsidio di salario pa asina por mantene cupo di trabao na nos pais. Companianan ta ricibi na un maximo di 60% di e fondonan pa asina por cubri un maximo di 60% di salario di e trahado.
“Nos tur sa cu aña pasa Gobierno a yuda pa sostene comercio, pasobra sin comercio no tin economia na nos pais. E sla cu covid-19 a bin cune ta uno grandi y pesey e sosten financiero cu gobierno a bin ta brinda, ta di vital importancia. Nos ta haya e fondonan aki fia for di Hulanda y desde e prome dia nos sa tambe cu e prestamonan aki tin condicion”, e mandatario a subraya.
Minister Xiomara Maduro a agrega cu pa e condicionnan aki tambe por mira cu tin control di parti di Hulanda, y den e caso di subsidio di salario tin control for di diferente angulo. Pues, no solamente for di Hulanda, pero tambe di CAft, y di Contraloria General di Aruba tambe tin su parti di control, pero ademas CAD tin su auditoria riba locual ta bira e otorgamento di subsidio, cu ta wordo facilita door di SVb.
“Bisando esaki, e aña aki sigur pa locual ta Conseho di Minister di Reino, den cual ta tuma e decisionnan pa Aruba cada bez por haya e fianzanan necesario, dia 26 di Maart ultimo a tuma e decision cu pa Aruba mester haci un control riba subsidio di salario, cu a wordo duna te cu December di aña pasa, y riba e control aki mester raporta prome cu dia 1 di Juni 2021. Cu e decision aki nos mester raporta na CAft pa asina nan formula un conseho, pa locual ta e Conseho di Minister di Reino, pa asina nan tuma e decision pa locual ta bira e fondo di sosten di likidez cu nos mester haya di Hulanda, pa cubri e tercer cuartal di 2021.
“Manera nos tur sa Aruba su economia a cuminza draai, pero te ainda nos ta depende di e fianzanan di Hulanda pa asina por cubri e gastonan necesario y specialmente, pa por brinda comercio e yudanza, via subsidio di salario. Y pesey, aworaki ta bay tuma decision den Conseho di Minister di Reino, pa locual ta bira e fondonan cu nos ta haya pa e lunanan nos dilanti, di Juni, Juli y Augustus.
“ Mas cu claro, mester a presenta e controlnan aki, cu a wordo haci y na e momentonan aki ta mira cu e resultado ta bini. Pues, ayudo di likidez ta mara na control di Hulanda, y Hulanda a manda controla si e subsidio di salario ta wordo paga cu e ayudo di likidez, si esaki a wordo duna corectamente, conforme e condicionnan stipula”, Minister Xiomara Maduro a indica.
El a reitera cu e controlnan aki ta tumando lugar y ya a yega te na October 2020, y ta trahando na e momentonan aki riba November y December 2020 y e informacion aki CAft ta haye pa nan formula nan conseho, pa Aruba por haya for di Hulanda, locual ta e tranche di Juli 2021. “E decision aki ta uno cu Conseho di Minister di Reino mester tuma dia 18 di Juni proximo, y pesey ta importante cu e trabao aki a wordo haci y e informacionnan aki a wordo brinda na CAft” e dignatario a bisa.
