'Escuela 'KoHehe' di Corsow cu charla dirigi na hende muher den agricultura

Hopi hende muher na Aruba ta motiva pa sembra y cosecha

ORANJESTAD (AAN): Hensley Martina, Presidente di e fundacion 'Escuela KoHehe' di Corsow, a duna di conoce cu esaki ta un fundacion cu ta duna lectura na comunidad y aworaki nan plan ta pa yuda hende muhernan den agricultura na Aruba.

            Nan ta promove mas tanto posibel e plantamento y duna nan e atencion cu hende muher merece. El a bisa cu hende muher tin un rol hopi importante den agricultura compara cu hende homber. Hende muher ta maneha e placa di cuminda, placa di cas, e ta bay supermercado, e sa kico pa cumpra, e calidad, etc.

            Martina a laga sa cu siman pasa tabata tin un reunion hunto cu un grupo di hende muher y a duna nan algun informacion y for di e reunion ey a lanta un comision di agricultura.

            A resulta for di e reunion cu hopi hende muher ta motiva y pa basta tempo ta wardando riba un organisacion pa yuda nan y nan e sosten necesario, a bisa.

            Historia di Aruba ta mustra cu hende muher tabata sembra y cosecha den cunucu. Hende homber, mayoria di nan no tabata sembra ni cosecha. Nan tabata mata bestia, pisca y traha cas. Cu tempo, hende muher a keda  un banda for di agricultura.

            Mas recien, a pidi pa duna hende muher e lugar cu e merece y dun'e su derecho bek na agricultura. Esey ta loke e scol aki kier haci na Aruba tambe.

            E proximo encuentro ta bay ta diaranson proximo, 17 di Augustus na Biblioteca Nacional Playa pa 7 or di anochi. Entrada ta gratis y esnan interesa por djis cana yega, a bisa.

            Martina a bisa cu nan tin basta aña ta bishita Aruba y a participa den diferente charla hunto cu oradornan internacional. Nan a sigui bin Aruba pa asina duna nan contribucion pa asina mehora e situacion di cada hende den agricultura.

            Loke kier logra na Aruba ta celebra dia mundial di alimentacion y agricultura pa prome biaha y dia mundial di hende muher rural tambe pa prome biaha.

            Den pasado nan a acerca Santa Rosa como tambe Minister Arends sin exito. Pero pa prome cu 15 di October lo wak di ki forma nan por duna nan sosten, Hensley Martina a expresa.