ORANJESTAD (AAN) – Parlamentario Marco Berlis, den conferencia di prensa di fraccion di MEP,
a elabora tocante e desaroyo cu e distrito di San Nicolas merece y a enfoca riba e construccion di proyecto di Hotel Secrets y e caso cu tin den Corte.
El a toca e tema di e disputa cu tin rond di e proyecto di hotel Secrets, cu ta para aworaki pa decision di huez, despues cu dos habitante a bin cu algun obhecion cu nan tin.
“Naturalmente, cada ciudadano ta haya e derecho di por haci esaki y ora nan ta kere cu ta algo hustifica, nan por trec’e dilanti. Mi tin cu bisa si, cu pa mi di wak un desaroyo positivo tumando lugar pariba, na San Nicolas, ta algo hopi bon y si nos wak e impacto posible, economico cu esaki por tin, cu cuponan di trabao, pa e movemento economico cu ta draai rond di dje, e ta dificil pa mi por compronde esaki”, Parlamentario Berlis a comenta.
El a agrega cu pa hopi tempo, habitantenan di San Nicolas ta aspira pa wak desaroyo na San Nicolas, y pa su persona sigur ta un cu ta pro, esaki.
Berlis a agrega cu den e ultimo decadanan, pa un of otro motibo, San Nicolas no a participa completamente, den e desaroyo y crecemento economico di Aruba, y sigur den e diferente periodonan di gobernacion “hopi cos a wordo bisa pero poco a wordo haci”.
“Naturalmente, mi no ta bisa cu no tin un movecion economico, pero mi ta kere cu San Nicolas tin asina hopi potencial, y por brinda hopi mas. Mi ta kere cu tin hopi mas cu por wordo haci pariba di brug y den mi opinion, un proyecto bunita manera esaki (Secrets) por trece un movecion economico den e parti di construccion”, Berlis a señala.
El a agrega cu compra di material y cuponan di trabao ta wordo facilita cu un proyecto manera e hotel, y e ta haci un impacto economico grandi, y ta conoci cu den e crisis cu Aruba ta pasando aden, cu ta uno economico y social, unda hopi hende no tin trabao, un proyecto asina por haci un cambio positivo, pa famianan cu por haya trabao y trece pan riba mesa y bay dilanti economicamente.
El a agrega cu e problema aki ta un kortgeding cu tin aworaki unda tin dos obhecion (bezwaard), y cu DOW y “Wellstands Commissie” a bisa cu nan si a motiva suficientemente y cu nan lo apela e obhecionnan aki di e dos ciudadanonan y nan lo trece motivacion un biaha mas, den esaki, pa asina aki kita esakinan y construccion por sigui, den e caso di e proyecto aki.
E tin entendi cu e problema ta den e parti unda ta wordo construi e 600 cambernan, pero cu e parti di e lobby cu ta bezig ta wordo construi aworaki, lo por sigui normalmente. Pues, lo haci tur posible pa e proyecto aki sigui dilanti, y pa e wordo completa.
E mes tabata tin e pregunta na unda e awa sushi di e hotel lo bay, y si e lo bay den lama. Pero el a wordo splica cu e hotel mes ta asina moderno, cu tin su propio sistema di procesa e awa sushi y cu lo uza esaki den irigacion. Pues banda di e movecion economico cu e proyecto aki lo trece cune, San Nicolas lo haya un hotel hopi moderno. Berlis a menciona cu tin diferente desaroyo positivo pa San Nicolas manera e proyecto di gas LNG, y un hotel boutique cu tambe lo wordo traha.
