Durante e pandemia y te aworaki FTA a logra: - ORANJESTAD (AAN) — Vicepresidente di FTA, mr. Jose Figaroa,
den conferencia di prensa unda a anuncia e di 24 Congreso Statutario di FTA, a expresa cu pa FTA e aña y mey cu ta tras di lomba, tampoco e tabata un aña facil, pero a logra yega na acuerdo cu tur e empresanan cu FTA ta representa nan trahadornan y a logra mantene nan na trabao. Aworaki nan tur a normaliza, ta funciona 100% y nan trahadornan a bay bek na 100% salario.
No obstante, e empresanan sindicaliza cu tin un relacion cu FTA, cu tur e Sindicato a logra di yega na un entendimento tanto durante e punto mas dificil di e crisis (crea pa e pandemia di covid-19), como tambe aworaki cu e parti mas fuerte di e crisis, en todo caso, pa loke ta trata e relacion di trabao, ta parce cu a mengua un poco.
“Mi por bisa cu nos a cera acuerdo cu, practicamente, tur empresa cu ta afilia na FTA, na momento cu nos tabata na e punto mas dificil, y aworaki, si mi no ta ekivoca, tur empresa a bolbe na normalidad. Cierto empresanan a bay di acuerdo pa reduci oranan di trabao na 80%, a reduci pago na 80%, a entrega cierto beneficionan, pero mientras tanto, cu tur e empresanan afilia a logra normaliza tur cos caba y tur hende ta bek na 100%, tur e beneficionan a bolbe y hasta cierto aumentonan di salario a regulariza. Di e banda ey, nos por bisa cu durante e parti mas dificil di e crisis aki, sigur nos a haya hopi melding di trahadornan, pero na dado momento nos a sa di deal cune y a cera acuerdonan cu tur empresa, y nos ta contento di por bisa cu tanto e tempo ey tabata tin comprension mutuo tanto di parti di e trahado como di e empresa, pa cu e situacion. Y nos ta contento di bisa cu nos a logra di normalic'e pa tur empresanan afilia na FTA”, mr. Figaroa a conclui.
