ORANJESTAD (AAN): Ursell Arends, lider di Partido RAIZ y cu proximamente lo bira Minister di Integridad, Naturalesa, Transporte y Cuido di Grandinan como tambe Vice Prome Minister,
a expresa palabranan di pabien na e futuro ministernan y na Prome Minister Evelyn Wever-Croes pa e dedicacion pa por a forma un gobierno stabil manera a priminti pueblo.
Arends a agrega cu "e trabaonan nos dilanti ta inmenso y nos ta consciente di esaki. Manera Minister President a bisa e ta bay rekeri un team work. E ta bay rekeri pa nos tur traha hunto pa logra nos metanan.
Aruba mester di nos tur. En bes di para na banda aworaki critica, husga of condena, ban traha hunto pa hunto nos por hiba Aruba pa dilanti".
El a bisa cu a encontra cu situacionnan financiero y economico duro, pero como un team uni lo bay hiba Aruba pa dilanti y zorg pa loke ta priminti den campaña, zorg pa haci esakinan tambe realidad caminda cu e beneficionan cu e isla aki lo bay produci lo yega na cada un di e ciudadanonan cu mester di esaki tambe.
"Loke nos a logra ta 'think outside the box, reinventa con gobierno ta funciona y esey ta loke e ministernan aki ta para p'e. Hunto a haya un partner cu tambe ta kere den esaki y nos ta bay mustra cu e manera tradicional di traha den vertical ta bay cambia y hunto nos ta bay pone e aparato publico y e ministernan traha den un forma horizontal", a bisa.
Esaki kisas tin e politiconan tradicional confundi y pesey nan ta cuestiona dicon e reparticion di carteranan aki. Pesey e ta pidi pueblo di Aruba pasenshi y duna nan e oportunidad di cuminsa traha y mustra con un gobierno moderno lo traha den un forma moderno pa hiba e isla aki pa dilanti, Ursell Arends a manifesta durante e presentacion di e ministernan y nan carteranan.
