Placa ta Pueblo den problema financiero mester wordo bon vigila - Restriccion serio di e uzo di e fondo di Parlamento ta necesario
ORANJESTAD(AAN)— For di 2014 cu Hulanda a bati na porta di Aruba, tabata conoci cu e pais ta den un problema sumamente serio riba tereno financiero.
Ta e hecho cu Aruba tabata practicamente bancarota, a haci cu Reino Hulandes a introduci supervision pa pone un fin na e forma cu abuso tabata wordo haci di fondonan cu mester wordo cubri cu e placa di belasting di Pueblo.
Parlamento di Aruba sigur ta na haltura di e problema serio cu e Pueblo di Aruba ta confronta pa asina paga pa medidanan cu mester a wordo tuma, despues di e abuso total di e Arubiano durante e periodo di 2009 pa 2017 ora entrada di e pais a wordo corta pero tambe e pais a wordo hinca den un maneho di aventura.
Den e situacion aki ta sumamente dificil pa Pueblo acepta, cu Parlamento cu mester representa Pueblo y cu mester ta modelo di restriccion di placa cu ta wordo gasta for di fondo di Pueblo, conoce un fondo pa cubri gastonan di Miembronan di Parlamento pa nan por haci nan trabou manera mester ta.
Segun Ley, Parlamento por haci un apelacion na tur Departamento di Gobierno, pa haya asistencia den e control cu Miembronan di Parlamento mester eherce segun e Derecho di Budget cu nan tin cu mester garantisa bon vigilancia di placa di Pueblo.
Ta hustamente e Derecho di Budget aki ta crea necesidad di un concenshi limpi di Miembronan di Parlamento e enfrente e Pueblo di Aruba, pasobra nan ta eherce e derecho aki pa garantisa bon uzo di placa di Pueblo.
Den e caso penal contra Alan Howell ta bini dilanti con un derecho di un Miembro di Parlamento por bira motibo pa Husticia bay en busca di posibel diamanta cu e trabou den Parlamento por a produci pa Alan Howell.
E caso contra Alan Howell ta centralisa rond di e fondo cu a wordo crea pa Miembronan di Parlamento haci uzo di expertonan pa nan por haci nan trabou.
Ora tuma nota di e placa cu ta paga Miembronan di Parlamento pa haci nan trabou, e pregunta logico ta pakico nan mester di mas placa pa traha.
Pakico no ta haci uzo di expertonan di Gobierno cu ta na disposicion di Miembronan di Parlamento? Pakico no ta haci uzo di Algemene Rekenkamer Aruba? Pakico no ta haci uzo di Raad van Advies?
Pa ta sumamente honesto e resultado di trabou di Miembronan di Parlamento hopi bez ta laga pregunta serio habri riba e calidad di trabou cu Pueblo ta ricibi pa tur loke e ta paga un Parlamento.
Awe autoridad ta investiga kende a ricibi placa pa kico y entre otro a bay busca informacion di un persona cu ta conoci den periodismo. Farah Boekhoudt.
Den esaki lo a bini dilanti cu Boekhoudt lo tabata skirbi press release pa Alan Howell, cu tabata traha pa Cuerpo Policial caminda redaccion di textonan ta ocupa un lugar central.
E caso di diamante cu fondo special cu placa di Pueblo por produci pa politiconan den Parlamento ta demostra, cu mester pone restriccion na loke ta wordo gasta dor di Miembronan di Parlamento pa nan por haci nan trabou y mester cuminsa exigi di Miembronan di Parlamento cu ta wordo paga pa haci nan trabou, pa nan ta capaz di haci esaki cu of sin ayudo di miembronan di nan partido, cu ta e origen di listanan di candidato cu mester ta prepara pa por representa Pueblo, cu no tin placa pa fondonan cu por habri caminda pa caso penal.
