Algun comcomber chikito cultiva na Santa Rosa entrega na Cas pa nos Grandinan

ORANJESTAD (AAN): Ademas di ta duna conseho, bende simia, y yuda agricultornan local,

na Santa Rosa a cuminsa cultiva algun mata tambe pa check con facil nan ta crece.

   Santa Rosa a planta nan den baki (yama “raised beds”) cu ta un alternativa pa esnan cu tin suelo di mal calidad, of cu no tin mucho espacio pa planta.  Pesey Santa Rosa a haci e experimento aki pa mira si e ta mas facil of no.

   E resultado tabata asombroso.  Na comienso di Maart caba, nan a cosecha como 15 kilo di Comcomber Chikito, y ta ilustra con facil bo por planta den baki y haya resultado tambe.

   Y danki na esaki, recien nan a logra di cultiva varios Comcomber Chikito, y tambe a cultiva Pica fresco (cu simia procedente di Suriname), y esakinan dado momento a bira na monton.

   E Pica aki ta conoci como “Ayuma Peppers”.  E simia a bin for di Suriname, y ta hopi conoce pa su nivel halto di pica.  Santa Rosa a planta nan, pa asina sigui replanta pa por haya simia pa bende cu agricultornan.  E ta un muestra cu nos por planta hopi mas di loke nos mes ta imagina.

   Den fin di siman cu a pasa, Santa Rosa a dicidi na entrega algun kilo di Comcomber Chikito y tambe Pica fresco ‘Ayuma Peppers’ na Cas pa Nos Grandinan cu ta cay bao Fundacion SABA.  A lo menos nos grandinan por bay goza di un fabuloso Comcomber Stoba cu esaki.