ORANJESTAD (AAN): Tabata den e tercer siman di luna di Mei, cu DIARIO a publica un relato con dos alumno di Universidad tabata core stage na Departamento di DIMAS pa asina yuda cu nan tesis.
Uno di nan tabata Emilane ‘Emy’ Geerman, kende ta un ex-alumno di Colegio Arubano, cu na 2017 a cuminza su estudio pa International Business and Management Studies (IBMS) cu un major den Branding na Haagse Hogeschool, na Hulanda.
Desde Februari 2021 el a bin Aruba na Departamento di DIMAS, haciendo su Tesis final pa cu e formacion di Bachelor.
E bon noticia a drenta awor cu el a logra su Bachelor. Esnan di DIMAS tambe ta felicita Emilane cu su graduacion.
Esnan di Departamento di Integracion Maneho y Admision di Stranhero ta felicita Emilane Geerman cu e bunita resultado di culminacion di su estudio Bachelor den International Business na Haagse Hogeschool na Hulanda. Emilane a haci un estudio interno y externo unda cu na prome lugar a midi te na ki grado empleadonan di DIMAS ta identifica nan mes cu e mision y vision di e organizacion y na e otro banda a midi externamente e grado di satisfaccion di clientenan.
DIARIO a compronde cu e tesis final di Emilane su estudio tin e titulo “Who We Are vs. How Others See Us”. Cu ambos estudio haci Emilane a brinda DIMAS un base di recomendacion extenso pa desaroya un cultura di integracion y aceptacion tanto interno como externo. Di parti di gerencia y personal di DIMAS nos ta extende un palabra di felicitacion y ta desea Emilane hopi exito y un comienso briyante di su carera.
