Elmar a usa proceso di haci reparacion na palo di luz cu coriente keto bay conecta na dje

Accident na Tarabana

ORANJESTAD (AAN): Un accident di auto na Tarabana cu a causa daño riba un palo di luz di NV Elmar, a pone cu e compania mester a haci uso di un proceso moderno pa haci reparacion mientras cu keto bay tin coriente riba e palo aki ta pasa.

   Esaki ta conoci awendia como trabao di reparacion ‘hot’, sin cu nan tin di ‘shutdown’ e suministro di coriente riba liñanan di tension halto pa no interumpi e servicio di coriente den e areanan den vecindario di Turibana.

   Pero toch, pa realisa e trabao di reparacion, NV Elmar a haye toch obliga na interumpi servicio di coriente di 8:00 am pa 2:00 pm riba e wayanan di voltahe regular di 127 Volt, cu a afecta mas o menos 20 cas of negoshi na Turibana.

  E situacion di accident di auto cu ta involvi un palo di coriente no solamente ta causa daño na e grid di coriente di Aruba, pero tambe ta laga un area sin suministro di coriente temporalmente, cual ta causa incomodidad pa e clientenan. Cada trabao di reparacion ta worde evalua pa determina si e ta rekeri un ‘shutdown’ di suministro di coriente pa motibo di siguridad di nos tecniconan. Den caso cu Elmar por eherce ‘hotwork’, nan ta ‘insulate and isolate’ e kabelnan di voltahe halto pa eherce e trabao di reparacion sin interumpi e servicio di coriente. Cual ta e caso awo unda nos por sigui suministra coriente den e areanan rond di Turibana.

   Un bes mas, nan kier haci un yamada na tur chauffeur pa maneha cu cuidao y consciente, sigui reglanan di trafico, pa asina evita accident di auto. Cuida bo mes y pa otro. Tur hende riba caminda ta forma parti di nos comunidad y nos tin cu traha hunto pa mantene un ambiente di trafico sigur pa un y tur.