Cantidad di sushi ta un berguenza!
ORANJESTAD (AAN) – Un ciudadano a yama na mesa di redaccion di DIARIO, pa mustra su preocupacion y su indignacion, di mira con sushi Aruba ta birando ultimamente.
Den e caso aki el a referi na un area specifico entre Mahuma y Drive-In, cu pa dianan caba e ta mira hopi sushi, siendo cu ta un parti turistico ya cu cantidad di turistanan ta pasa eybanda. E ciudadano kier a pidi encarecidamente City Inspector pa por fabor bay tira un bista y tuma accion.
Pero tambe e ta pidi tur ciudadano pa no benta sushi unda cu nan ta desea, si no ta den e bari di nan mesun cas. Mescos cu tene un cas limpi ta pa nan propio bienestar y nan vecindario. Tene Aruba limpi ta na bienestar di nos tur y nos generacionnan futuro.
Enberdad Gobierno tin su instancianan cu ta realiza e tarea di percura pa Aruba ta limpi, pa corta mata rond di caminda, embeyece y percura cu e cara di nos dushi isla ta bunita pa nos mes y pa nos bishitantenan di afo. Pero, e ta puntra, na unda nos mes consenshi ta keda? Nos empatia cu nos mes pais? Nos propio responsabilidad y dignidad di tin un pais cu tur hende ta respeta, entre otro pa su limpieza, manera temponan pasa cu e turistanan tabata gaba Aruba su ciudad y alrededornan, incluso ora di nos mes bay den exterior, no tabata falta hende cu ora tabata tende cu ta di Aruba nos ta, tabata expresa: “Oh, Aruba, masha bunita pais, cu hende hopi amable y su ciudad y barionan hopi limpi!” Hopi orguyoso nos tabata sinti e ora ey! Na unda esaki tur a keda?
Kico ta pasando ultimamente? Na lugar di e orguyo di ta un pais organiza y limpi, nos ta sinti berguenza ora nos ta cana mira cuanto sushi ta acumulando practicamente tur caminda, for di ciudad den barionan. Wak e edificio antes DOW!
Casualmente, un par di habitante di un area di Ponton tambe a yama DIARIO, cuestiona e cantidad di sushi na cant’i caminda banda di e caya asfalta cu ta sali na Hato. Esta, un berguenza! Y ken ta causa esaki? Hende mes! Locual sushedad ta crea ta malesa causa pa djaca, cu ta esnan cu ta biba feliz meymey di sushi cu no solamente ta duna e barionan un mal bista sino cu ta crea pashentnan cu enfermedadnan cu docternan mes no sa kico nan ta! Por fabor, pone man na curazon, Aruba ta di nos, ban cuide! Ban rescate di e “dump nacional” cu hendenan mes ta lantando rond! Pone camara unda cu por, ta mas cu urgente!
