Elizabeth Johnson eligi como Miss Teen Aruba International 2021

ORANJESTAD (AAN): Tabata Diadomingo anochi net un poco despues di 11:00 pm, cu a anuncia Elizabeth Johnson como e reina nobo di Miss Teen Aruba International 2021. 

    Esaki den un Cas di Cultura caminda publico tabata hopi anima.

    Na di dos lugar a sali Ashantee Martus, y di tres lugar ta pa Gabriella Piazi.  Miss Teen Model 2021 a bira Karoline Oliveros.

   A toca honor na Ministro di Cultura, Xiomara Maduro pa pone e bunita corona riba cabez di Elizabeth Johnson, kende a representa Mirrors by Edgar Kock.

   E tabata un anochi cu bon ‘tempo’, unda no tabata existi ningun gap den e show.  Tabatin baile, canto, y hasta e cantante local François a lanza un cancion nobo di Buleria exclusivamente pa publico.

   Algo cu publico a goza inmensamente ta un sesion di combersacion cu tur ocho candidata tabatin riba escenario.  Aki Nurianne Arias a haci un bon trabao pa asina combersa cu nan, pa publico a conoce nan un poco mas di cerca.

   E candidatanan aki si a balia hopi mes.  Tabatin e show di apertura, y despues tabatin mas momento cu nan a bolbe balia, incluyendo durante un cancion canta pa Mitchell Tromp.

   E certamen no tabatin sesion di trahe di baño, pero si un fenomenal sesion di Trahe di Gala cu a hala atencion di tur hende.  E creatividad, briyo, y dedicacion pa cada vestuario wordo confecciona, a laga publico ta admira nan di tur angulo.

   Pa yega na final, a saca 5 finalista y eseynan tabata Ashantee Martus, Kaylienne Ennis, Karoline Oliveros, Elizabeth Johnson, y Gabriella Piazi.

   Mas despues a saca 3 finalista cu tabata Gabiella Piazi, Ashantee Martus, y Elizabeth Johnson.

   Premionan extra cu a wordo duna, tabata Miss Teen Popular y a bay pa Elizabeth Johnson, Miss Teen Best Makeup a bay pa Elizabeth Johnson, y Miss Teen Best Hairdo ta Gabriella Piazi.

   E organizador George Winterdaal a splica cu pa 2022, nan lo trece cambio na Miss Teen Aruba, y lo bin e.o. cu categoria di Miss Teen Aruba Petite, tambe Miss Teen Aruba Glorious.  Hopi interesante sigur pa bay mira eseynan.