ORANJESTAD (AAN): Director di ImSan (Instituto Medico San Nicolas), Dr. Joel Rajnherc a duna di conoce ta wardando pa e gobierno nobo drenta pa palabra nan plannan pa futuro pa wak kico ta bay ta factibel y con por 'deal e business case' cu a haci.
Despues di a reuni cu Formador di Gobierno, Evelyn Wever-Croes, Dr. Rajnherc a bisa cu kier wak si ImSan por defende suficientemente e importancia y e beneficionan cu esey ta trece, a indica.
Tin biaha tin cu inverti placa pa saca beneficio y no solamente spaar. E trabao di spaar mester wordo haci conhuntamente cu otro partidonan y banda di esaki mester traha un bon presupuesto con pa hacie, a bisa.
Esnan cu ta duna cuido, esnan cu ta ricibi cuido y esnan cu ta provee e servicionan mester sinta hunto y bin cu solucionnan cu ta factibel pero tambe sostenibel, Rajnherc a indica.
ImSan tabata bezig cu tur esaki pero e plannan a wordo afecta door di e pandemia. Esaki kiermen cu e atencion mester a wordo dividi riba diferente otro cos. No por a resolve un problema sin cu ta mishi cu e otro, a remarca.
"Pasobra si bo bay pone tur bo placa den e tratamento di e Covid virus, bo no tin placa pa e tratamento di otro cosnan cronico. Awor nos tin cu bay haal in tur e cuido cu nos no por a duna durante 2020 y e prome lunanan di 2021. No solamente ImSan", a señala.
A pesar di Covid, por a cuminsa di nobo cu e cuido di e pashentnan cronico. E sala di operacion a cuminsa draai di nobo tambe. E radioterapia a cuminsa net na e momento crucial riba 1 di April 2020.
Dia 13 di Maart, Aruba a haya e prome pashent di Covid y tur e fronteranan unda tabata manda e pashentnan a cera. Si no tabata tin e oportunidad cu por a cuminsa cu radioterapia na ImSan, unda lo a manda tur e pashentnan ey? No tabata tin lugar, Dr. Joel Rajnherc a enfatisa.
"Nos mester a hacie nos mes, nos a para riba nos mes pianan na Aruba. Nos a hacie y nos ta hopi orguyoso riba e samenwerking cu nos tin entre tur e partidonan. E eerste lijn zorg, HAVA. E relacion cu HOH ta birando mihor. E mester ta un samenwerking riba halto calidad y nos ta mirando cu e ta posibel", e director di ImSan a expresa.
E ta manera un simiya cu mester plant'e pero e no ta bira un mata den un dia. E tin cu crece y esey ta bayendo bon, a agrega.
