Parlamentario Ricky Hoek:
ORANJESTAD (AAN): Den su papel como Presidente di Partido MEP, Parlamentario Ricky Hoek a expresa su gratitud na tur hende cu a participa, a atende y a yuda organisa e programa 'Ban Topa' durante e aña 2023, un iniciativa di Movimiento Electoral di Pueblo (MEP).
E proyecto aki a resalta como un di e enfokenan principal di MEP pa e aña aki, dirigi na comunidad. Hopi biaha, ta tende expresionnan den pueblo cu politiconan no ta keda cerca nan of no ta scucha nan. "Nos no kier a para keto eynan. Pesey desde januari 2023, nos a cuminsa e proyecto, e programa di 'Ban Topa", a expresa.
Hoek a enfatisa cu e aña aki tabatin cuater sesion caba, cu e ultimo na e pueblo di Noord. E otro sesionnan a tuma luga na Piedra Plat, Savaneta y na San Nicolas. Tur actividad tabata hopi exitoso, cu un cantidad grandi di hende participando. Preguntanan importante a keda formula cu a wordo atendi efectivamente.
Entre e preguntanan ta inclui topiconan relaciona cu infrastructura, asfalt, costo di bida, belasting, asistencia huridico entre otro. E ministernan, parlamentarionan y candidatonan di Partido MEP a atende e preguntanan durante e programa 'Ban Topa'. "Mi kier gradici un biaha mas tur hende cu a participa, candidatonan di MEP presente durante e sesionnan y tambe e comunidad cu a participa activamente den e proyecto aki", Hoek a expresa.
Pa e aña 2024, Hoek a anuncia cu e programa 'Ban Topa' lo continua despues di e temporada di carnaval. Mas informacion lo wordo duna proximamente y for di awo e ta invita comunidad pa ta presente, pasobra e programanan aki ta brinda oportunidad pa expresa preocupacion, sugerencianan y haci preguntanan na gobierno, Parlamento como tambe na Partido MEP.
"Nos ta topa den e siguiente 'Ban Topa' na aña 2024", asina Parlamentario Ricky Hoek a conclui.
