Minister Rocco Tjon hopi contento y positivo:
ORANJESTAD (AAN) – Minister di Husticia y Asunto Social Rocco Tjon, den entrevista cu DIARIO a referi den conferencia di prensa, na e proceso cu ya caba ta andando pa algun aña, pa sigui profesionaliza Arumil.
“Ta importante pa splica cu e meta pa full e proceso aki ta pa nos yega na un concepto di ley nobo como base, mirando cu esaki ta un ley di hopi aña atras. Y a base di un Landsverordening nobo y un Landsbesluit nobo, nos por regla e posicion legal di Arumil mucho miho. Obviamente, esaki ta bay den bon cooperacion cu varios Departamento na Aruba, manera DRH, Directie Wetgeving cu nos ta bay envolve aworaki, pero hopi importante, tambe cu Departamentonan di Curacao y Hulanda”, e dignatario a señala.
Tjon a informa cu siman pasa el a reuni cu director di Asuntonan Huridico di e Ministerio di Defensa di Hulanda, y alavez tambe cu e Brigada General di Ministerio di Defensa y Comandante Hansen, cu ta e Hefe maximo di Kustwacht, y den e caso aki tambe di Arumil, pero tambe di Curmil.
“Un reunion sumamente importante, unda cu nos a repasa un rato tur e pasonan cu a wordo tuma caba. Manera mi a indica caba, 2022 y 2023 ya caba tin cierto conceptonan a wordo traha; e vision y e direccion strategico unda nos kier bay cu Arumil a wordo defini, y mi ta contento di por bisa cu e trayectonan pa por logra esaki, tambe a wordo defini y mi ta contento di por bisa cu e trayectonan pa nos por logra esaki, tambe a wordo defini y tin e conceptonan cla”, Minister Rocco Tjon a splica.
Tjon a agrega cu aworaki na tin un time line defini tambe, unda cu na November di e aña aki, e version final di e conceptonan di ley aki lo ta cla, pa di e forma ey Directie Wetgeving por tira un bista riba esaki. “E intencion ta pa na inicio di 2025 nos inicia e trayecto di ley, pues e Wetgevingsprocess, cu miras pa 1 Januari 2026, e leynan aki drenta na vigor”, Minister Tjon a subraya.
Minister Tjon a puntra kico esaki ta nifica, no solamente pa e personanan di Arumil pero tambe pa Pais Aruba? Di con nan kier haci esaki?
E dignatario a subraya cu ta hopi importante pa e Arumilernan pa nan ta nifica un cambio grandi pa nan posicion legal. Nan ta wordo clasifica como ambtenaar, cu miras cu despues cu nan caba di sirbi Arumil, nan por stroom door den e cadena hudicial.
“Mi ta kere cu esaki ta asina importante, cu e envolvimento di DRH tambe tabata importante pa nos por a defini tur e trayectonan cu ta bay bin”, E dignatario a agrega.
Minister Tjon a menciona cu e trayectonan pa Polis, Warda Nos Costa of KIA ta diferente, y e ta sumamente satisfecho cu esaki ta bay bira un realidad. “Nos a combersa tambe den e reunion di siman pasa, anticipando cu na 2026 esaki ta bin na vigor, lo bay haci un analisis di cuanto Arumilernan lo mester sali for di servicio pa comienzo di 2026, pa aworaki caba por cuminza cu e trayectonan pa nan por drenta sea na Cuerpo Policial, KIA, CEA, etc”, Minister di Husticia a señala.
Minister Tjon a bisa tambe cu den e diferente organizacionnan cu ta “ongoing” manera KPA, nan ta tene esaki na cuenta cu esaki, unda cu Arumilers por wordo tuma den e organizacionnan aki na algun departamento of afdeling specifico. Pa esaki bira un realidad e training mester cuminza na tempo y for di e parti di Hulanda nan a indica tambe, cu nan ta dispuesto pa pone e fondonan disponible, leidop e Arumilers.
