Segun Edsel Figaroa, Presidente di TOPA:
ORANJESTAD (AAN)-- Presidente di Sindicato TOPA, Edsel Figaroa, a menciona den entrevista cu Matutino Diario, cu e director di KIA ta haciendo tur su esfuerzo pa bin cu un klas nobo pa e Bewaardernan.
“Es mas, mi por a compronde cu tabata tin un klas cu KIA mester a cuminza cu ne, pero na cierto momento el a wordo hala un banda, y a duna preferencia na KPA. Mi no ta duda cu polis tambe tin mester di personal, pero e situacion alarmante awo, ta KIA. Mi kier pensa ni menciona kico lo sosode si algo mester pasa eyden, pa falta di trahado”, Figaroa a indica.
El a expresa cu e situacion a bay hopi for di man y cu KIA ta un “time bomb”!
“Pa mi bisa, e edificio ora mi drenta eynan, y mi ta mira con e structura ta, (e tabata traha na DOW) y ora mi ta wak e murayanan, mi ta reza pa nada no pasa eyden”, Edsel Figaroa a subraya.
El a expresa cu e tin hopi aprecio cu e trahadornan, cu ta traha den e situacion cu tin eynan y nan ta bin trabao.
“Ami nunca a haci trabao di warda, pero trabao di warda den un edificio asina ta hopi mas erg”, Figaroa a remarca.
El a reitera cu mester bin un solucion urgente, pasobra nan tur ta trahando demasiado ora. Y no por reforza e falta di trahado na KIA cu hende di otro departamentonan, pasobra Bewaarder ta un opleiding special, unda nan ta wordo prepara pa atende cu presonan directamente, y esey no tin hende cu por hacie. Nan no ta Beveiliging. Kizas nan por yuda, pero esey ta otro opleiding apart. Pero por pasa si, si un situacion ta presenta di emergencia, mi ta kere polis, CEA, mariniers kazerne, lo por duna un man, pero mi ta spera e situacion no yega di leu ey”, e lider sindical a señala. Awo e ta wardando e señal cu e trahadornan di KIA dun’e. “Por ta nos por manda un carta ainda, duna dos biaha 24 ora pa sinta, y despues si nan por tuma e paso cu nan a bisa mi cu nan kier tuma”, Edsel Figaroa, Presidente di TOPA a reitera.
