Directie Natuur en Milieu ta conmemora
ORANJESTAD (AAN): Riba Diamars, Aruba y mundo a celebra Dia Mundial di bida di bestia y mata salvahe y na Ingles yama "World Wildlife Day" (WWD). E aña aki, Nacionnan Uni a dedica e dia aki na e rol fundamental cu mata medicinal y aromatico tin den nos bida diario, bou di e tema: “Mata Medicinal y Aromatico: ta yuda conserva salud, herencia y sobrevivencia”.
Desde cu Asamblea General di Nacionnan Uni a proclama e fecha aki na 2013, 3 di maart a bira un evento anual di mas grandi dedica na bida salvahe di mata y bestia. E fecha ta recorda e firmamento di e convenio di CITES (Convention on International Trade in Endangered Species of Wild Fauna and Flora), di cual Aruba tambe ta forma parti di esaki, cu e meta pa percura cu comercio internacional di especie salvahe no ta forma un menasa pa nan sobrevivencia.
E balor di nos flora local: Directie Natuur en Milieu (DNM) ta enfatisa cu tin mata protegi acuerdo nos leynan local vigente, cu nos antepasadonan a uza como base di medicina casero. Na Aruba, e uzo di mata pa remedi casero ta forma parti di nos herencia cultural. Pero e matanan aki no ta solamente base di hopi remedi pero nan ta importante pa e ecosistema di flora y fauna.
Segun datonan global, rond di 70% pa 95% di e poblacion den paisnan den desaroyo ta depende di medicina tradicional. Esaki ta inclui matanan manera e Aloë, orkidia y hopi otro sorto cu ta crece den naturalesa.
Balor economico y cultural cu ta mara na mata medicinal ta: (*) Salud: Hopi componente activo den remedi moderno ta bin directamente for di fuentenan natural. (*) Sobrevivencia: Un den cada cinco persona rond mundo ta depende di mata pa nan alimentacion y entrada. (*) Ecosistema: tin di e matanan aki ta crucial pa polinisacion manera e trabao cu parhanan, abeha, raton di anochi y barbulet ta haci.
Menaza y Conservacion: DNM ta informa cu globalmente mas cu 20% di e especienan di mata medicinal ta na peliger di extincion riba e "IUCN Red List". Factornan manera destruccion di habitat y cambio di clima ta e menaza principal.
Pa 2026, e enfoke ta pa percura pa uzo sostenibel di e recursonan aki, respetando e conocemento tradicional y protehando e biodiversidad pa futuro generacion. Esaki ta cuadra cu e metanan di e Kunming-Montreal Global Biodiversity Framework pa proteha bida salvahe contra comercio ilegal y degradacion di habitat.
Yamada na comunidad: Dia Mundial di Bida di Bestia y Mata Salvahe ta un momento pa nos tur para keto y aprecia e bunitesa di nos naturalesa. Directie Natuur en Milieu ta invita comunidad di Aruba pa siña mas di nos flora y fauna local y pa contribui na nan proteccion. Y pa loke ta trata e sorto di mata invasivo Neem. por sigui kita nan y traha remedi casero y otro uzo manera pesticida natural tambe.
“Nos bida ta mara na naturalesa. Door di cuida nos mata y bestianan salvahe, nos ta cuida nos propio salud, herencia y futuro.”
