Den conferencia di prensa: --- ORANJESTAD (AAN) – Diahuebs cu a pasa, a tuma lugar un conferencia di prensa, den Cas di Cultura,
cu presencia di Ferdinand Franca, docente di CKV (Culturele en Kunstzinnige Vorming) na Maria College Mavo, e directora di e scol señora Angeline Rosenstand, Shaindra Ashby, Nigella Kost y Stanley Dabian, vocero di Departamento di Cultura Aruba.
E meta di e conferencia di prensa aki ta pa duna informacion tocante e Musical “Planta Awe, Cosecha Mañan” cu lo tuma lugar e dianan 8 y 9 di April proximo, na Cas di Cultura.
Ferdinand Franca a menciona cu e musical aki ta un cooperacion di e Grupo di Teatro CCCA: “Crea, cultiva, arte y cultura na Aruba”.
“Hunto cu Maria College Mavo nos a traha un tremendo musical y asina nos a cuminza na aña 2019, cu e ‘after school program’ cu e tema ‘Turista riba mi Isla’ cu pa motibo di pandemia, nos mester a postpone.
Pero e aña aki nos tin e grato noticia pa anuncia cu nos ta bay cu e musical aki, y esaki en conexion cu celebracion di 80 aña di Maria College Mavo”, Franca a menciona.
Seguidamente, señora Angeline Rosenstand, cabesante di Maria College Mavo a hiba palabra, y el a acentua cu esaki ta un scol unda trabao den ekipo, ta hopi importante.
“Nos lema ‘I am because we are’ ta refleha e habilidad di traha hunto, pasobra trahando hunto nos ta yega leu den bida.
Awe, sinta akinan, nos ta hopi orguyoso di nos team dinamico di Maria College Mavo, nos alumnonan, nos ex-alumnonan, mayornan, tur a bin hunto bao liderazgo di meneer Ferdinand Franca, anto pa asina nos saca e potencial di nos hobennan. Esaki ta sumamente importante pa e ora ey nan adkiri habilidadnan pa futuro. E semia cu nos planta awe den nos hobennan, nos ta cosecha. Nan ta bira hendenan di comunidad cu ta yega hopi leu den bida”, Rosenstand a expresa.
El a splica pakico a scoge Arte, pa celebra e di 80 aniversario. Arte ta un di e materianan hopi importante unda e hobennan ta adkiri habilidadnan di siglo XXI, pasobra mundo ta cambia constantemente y nos tin cu siña cambia hunto cune.
Ferdinand Franca a tuma e palabra bek y a splica cu un di e metanan di e Fundacion CCCA, cu ta lantando, ta pa involucra mas hoben den e arte escenico na Aruba.
“E fundacion tin como meta prepara, guia e futuro directornan di teatro, e futuro presentadornan di shownan. Y pasobra nos tur ta birando di edad lo yega momento cu nos ta bay retira, y e ora ey kico ta pasa cu e arte escenico na Aruba? Pues, pa salvaguardia tur esaki, nos ta preparando e hobennan, for di awo caba”, Ferdinand a señala.
Den e contexto aki el a presenta dos hoben cu ta causando furor riba tik-tok y nan ta Shaindra Ashby y Nigella Kost.
