E rol di AZV ta pa e dunador di servicio duna lo miho den cuido

Olga Rodriguez di AZV:

ORANJESTAD (AAN) — Olga Rodriguez, funcionario di AZV, den entrevista cu DIARIO relaciona cu su participacion den e “Quality of Healthcare Conference”, a splica cu e rol di AZV ta pa e dunador di servicio duna lo miho den cuido.

            “Mi a enfoca riba e parti di calidad, con e asegurador ta wak’e y ki influencia nos por duna, haci, stimula, yuda, pa e calidad di cuido na Aruba mehora pa e trahadornan, pero mas importante pa e pashentnan”, Rodriguez a bisa.

            Ta sumamente importante pa e trahadornan tambe ta riba e mesun nivel di calidad di cuido cu ta wordo duna na e pashentnan. “E ta un condicion cu bo no por negocia riba dje. E hendenan mester tin e instrumentnan y e conocimentonan necesario y e tempo. Nos ta conciente cu nos no por logra tur cos den un dia, pero sigur cu nos ta dispuesto pa scucha y hunto cu tur e partners logra di yega na e solucionnan necesario p’asina nos por duna e miho cuido na Aruba”, Olga Rodriguez a señala.

            El a expresa cu definitivamente Aruba ta un Isla unico y esaki ta un bendicion. “E ta trece si, su retonan. Aruba ta un isla na unda cu nos tin profesionalnan cu un gran curazon, pero nos tin hopi limitacion, no solamente financiero, sino tambe door cu nos ta chikito, mester e ora ey mas hende rond di nos, cu mas specialismo, pero nos ta sigur cu hunto nos por yega na un situacion unda nos por logra mas calidad di cuido”, Olga Rodriguez a subraya.