Cheryl Rosa-Fingal di Inspectie Volksgezondheid a splica:
ORANJESTAD (AAN)—Diabierna siman pasa, dia 20 di September a tuma lugar e di dos IVA “Quality of Healthcare Conference” Aruba, den cual varios instancia y profesionalnan den salud a participa. Esun prome a tuma lugar na 2023.
Den entrevista cu Cheryl Rosa-Fingal, di Inspectie Volksgezondheid Dienst, a bisa cu nan a cubri e tema di “Quality Matters”. Esaki ta encera cu tin varios aspecto den calidad y riba esey kier a pone mas enfoke pa wak di con mester haci algo cu calidad, kico ta e “driving force behind that” (kico ta e forza cu ta impulsa esaki), kico ta e diferente sistemanan cu tin.
Inspector Cheryl Rosa-Fingal a presenta e tema “Connecting the dots in quality of healthcare”. Mas di 150 profesional den salud a participa den e conferencia aki, y pa Inspectie esey ta unda nan tin nan toezicht riba nan. “Nan tur ta invita akinan, y ta un placer masha grandi mes pa wak tur tipo di profesional. Hopi biaha bo ta wak solamente docternan por ta, of nurse. Akinan bo tin di tur ramo, di fisioterapista, partera te cu psicologo, director di hospitalnan, y mas”, Cheryl Rosa-Fingal a menciona. El a agrega cu bunita di calidad ta cu pa mas bon cu ta semper por mehora. E ta riba hopi area y si bo no tin mucho calidad bo por wordo inspira con pa cuminza. “Si bo ta hopi bon den calidad caba, hasta certifica, bo tin acreditacion den sistemanan di calidad den salud, ainda bo por keda mehora.
E dama a señala cu por wak cu den transcurso di añanan y den e opleiding cu nan a sigui, cu tin mas enfoke riba calidad. “Antes, prome cu 1999, ‘pashent a muri pasobra el a drenta hospital, of pasobra e tin cu muri’, pues henter e concientizacion, eigenlijk, pa cu calidad a cuminza core desde aña 2000, mundialmente, y tambe aki na Aruba”, el a indica.
El a agrega cu eynan tambe por wak un variacion. Tin cu ta tranca den nan manera di pensa bieu, y tin di nan ta ‘top of the line’ y nan ta keda cu nan acreditacionnan, haci nan cursonan, pues no tin un punto di preocupacion. “Si en caso tin un individual, como inspectie nos ta bishita e individual, nos por comparti nos conocementonan”, el a comenta.
El a añadi cu e t den grandi tambe. “Nos tin un AZV, hopi di nan tin e gruponan profesional pa nan negocia cu AZV, pero pa papia di calidad den nan grupo di profesionalnan nos no ta wak esey hopi”, Inspector Cheryl Fingal a expresa.
El a bisa cu esaki ta djis pa chispa e candela grandi pa mas y mas compromete cu calidad y keda desaroya mas y mas riba e temanan aki, Cheryl Rosa-Fingal a subraya.
