Minister Melvin Wyatt-Ras
ORANJESTAD (AAN): E siman aki, Minister di Salubridad, Asunto Social, Cuido di Adulto Mayor y Maneho di Adiccion, Sra. drs. Melvin Wyatt-Ras, a participa den ceremonia di huramentacion y e ceremonia di graduacion official di EPI Sector Salubridad y Servicio.
Minister Wyatt-Ras a enfatisa cu profesionnan den sector di cuido y salubridad ta pidi no solamente conocemento y habilidadnan practico, sino tambe integridad, humanidad y responsabilidad. Segun Minister, e profesionalnan di mañan lo ocupa un papel importante den e cuido y guia di hende den diferente etapa di nan bida.
Dialuna, e futuro enfermeronan, trahadonan social pedagogico y asistentenan boticario a haci nan huramentacion. Minister Wyatt-Ras a recorda cu e huramentacion no ta solamente un formalidad, sino un promesa pa ehecuta nan futuro profesion cu integridad, respet y responsabilidad. El a enfatisa cu e promesa aki mester sigui guia nan den tur decision cu nan lo tuma como profesional.
Diaranson anochi, e studiantenan a celebra e ceremonia oficial di graduacion. E aña aki, 72 studiante a gradua, loke ta nifica cu 84% di e studiantenan di EPI Sector Salubridad y Servicio a completa nan estudio cu exito.
Den su discurso, Minister Wyatt-Ras a felicita e graduadonan pa nan dedicacion y perseverancia. El a recorda nan cu e diploma no ta marca solamente e fin di nan estudio na EPI, sino tambe e comienso di un etapa nobo cu ta pidi compromiso, desaroyo continuo y responsabilidad. Minister a anima e studiantenan pa sigui amplia nan conocemento, sigui crece y nunca stop di siña.
Como ultimo mensahe, Minister Wyatt-Ras a comparti un conseho cu e graduadonan:
"Cuida boso mes no ta un luho, sino un parti esencial di e responsabilidad cu boso ta asumi como profesional."
Na final di e dos ceremonianan, Minister Wyatt-Ras a expresa su gradicimento na directiva, docentenan, personal di EPI y tambe na famianan pa nan dedicacion y contribucion na e formacion di e graduadonan.
Na nomber di Ministerio di Salubridad, Asunto Social, Cuido di Adulto Mayor y Maneho di Adiccion nos ta felicita tur graduado y ta desea nan hopi exito den nan desaroyo personal y profesional.
Fin di comunicado.
