ORANJESTAD (AAN): Angeline Tromp di Insurance Association Aruba, despues di e reunion cu Formador a duna su declaracion na prensa.
Presente tambe Albert Niemeijer Presidente, Jeacques van der Scheer VP, como tambe miembronan di directiva Antonio Nemececk y Randall Croes.
Tromp a expresa cu nan ta hopi agradecido cu e asociacion di aseguro, representa pa tur e companianan cu ta activo riba e mercado, cu nan a haya un oportunidad pa sinta hunto cu Formador y su ekipo pa asina nan tambe por trece dilanti nan punto di bista.
El a bisa cu e reunion a bay hopi fructifero. A toca diferente tema cu ta importante pa e asociacion. Entre otro nan a papia riba e tema di e 'tax reform', cual ta e reforma di e sistema di impuesto.
Otro topico cu ta sumamente importante pa nan como e companianan di seguro cu ta bende e productonan di seguro medico ta AZV.
A comparti cu Formador algun punto di e combersacionnan cu nan ta hibando cu AZV y pa wak si por haya tambe un oportunidad pa sinta na mesa na momento cu ta bay continua cu e proceso di restructuracion, a indica.
Angeline Tromp a sigui bisa cu un punto hopi importante ta relaciona cu e hecho cu nan ta wak un aumento drastico den e cantidad di accidentenan di vehiculo. A papia riba locual ta nan experiencia y kico nan kier wak como e asociacion di seguro.
El a menciona e parti di comunicacion entre e departamentonan concerni pa asina yuda minimalisa e cantidad di accident cu tin consecuencianan mas drastico, pa no solamente nan como companianan di seguro pero tambe pa e personanan cu ta wordo afecta door di esaki.
Tromp a laga sa cu nan a keda sumamente contento cu nan a haya e oportunidad pa sinta na mesa y trece nan puntonan di bista y nan experencianan dilanti pa Formador pa esaki por wordo tuma na cuenta na momento cu e ta bay continua cu su proceso di formacion di e gobierno nobo.
