Segun Frank Benita di DOW:
ORANJESTAD (AAN) – Den un entrevista cu DIARIO, señor Frank Benita, Hefe di maneho di awa di RWZI na DOW, el a elabora tocante e problema di awa stanca cu tin dilanti Hotel Riu.
E funcionario a bisa cu nan a ripara cu esaki ta sosode, mayoria di biaha, den fin di siman entre 7’or cu 9’or cu nan ta haya melding.
E ora ey e picket tin cu sali bay haci un opname nan ta bin topa cu e pomp cu ta net dilanti di Hotel Riu, ta yena cu vet di cushina, y esaki ta stroba e operacion di e pomp, cu consecuencia cu awa ta sali riba caminda.
No ta conoci pa DOW di unda e azeta ta bin, pero si nan sa cu ta bin di sector horeca. Pero ora di haci cierto sondeonan pafo, ora nan puntra mayoria di esnan di horeca ta bisa cu no ta nan, cu nan tin un filtro. DOW ta laga un compania duna servicio y bay cu e azeta, pero e potretnan ta mustra otro. El a reitera cu e vetnan ta stroba e funcionamento di e pomp.
Benita a splica cu un bez cu nan identifica cualkier melding, nan ta actua y manda nan team pa haci limpieza. Varios biaha caba nan a haci limpieza di e vet y di e awa cu ta subi riba caminda.
Nan ta tira productonan di citros tambe riba caminda, pa combati e mal holo. El a comenta cu DOW tin 16 pomp di e tipo aki, y tin mas of menos 160 kilometer di riolering. E 16 pompnan ta haya servicio di limpieza, cada pasa un siman. E siman aki nan ta bezig cu tur 16 y ta salta un siman y ta bolbe ripiti su mes, y nan ta pone riba schedule e pomp dilanti Riu (e pomp di Palm Beach) y esun di Saliña.
Diadomingo cu a pasa DOW tabata yin un melding cu a cambia nan tipo di operacion un tiki, door cu nan sa cu e ta entre 7’or cu 9’or, e picket proactivamente ta sali den e oranan ey pa wak si tin awa riba caminda y esaki a wordo constata tambe, y a ripara cu un di e ampelers di e pomp di Saliña a kibra y mester a sake pa wordo drecha.
