Presencia Benny den Parlamento ta imagen criminal pa Aruba
- Un Miembro di Parlamento ta e imagen di Aruba y e Arubiano
- Huez a tene consideracion cu e tempo cu Benny tabata acusado
ORANJESTAD (AAN)- Prome cu un persona por drenta Parlamento, e mester presta huramento cu nunca el a priminti un persona of a compromete su mes pa haci un persona un fabor.
Benny Sevinger, na momento cu AVP a exigi pa despues di su detencion como acusado e drenta Parlamento, a uza Nomber di Dios, pa hura cu nunca el a compromete su mes, a mara su man pa cumpli cu un promesa cu el a haci hende.
Pa prome bez den historia di Aruba, Benny Sevinger como acusado den e caso Avestruz, a subi lista politico di AVP den un proceso cu a tene Aruba lanta e anochi prome cu entrega di lista di candidato.
Ta conoci cu te laat, ainda e participacion di Benny Sevinger como candidato riba lista di AVP, tabata na discusion den e partido y cu finalmente e intentonan di e lider di partido a logra, ora a pone Benny Sevinger te abou na e lista pa despues pidi tur hende pa vota pa Benny Sevinger.
Cayanan di Aruba a wordo yena cu activistanan di Benny Sevinger den e bario cu mas tabata gosa di su popularidad.
Loke esaki ta nifica: AVP no a educa su votadornan kico e importancia di e participacion di un persona na Parlamento di Aruba, caminda e mester hura cu su consenshi ta limpi y cu tur loke e lo haci ta di acuerdo cu su consenshi y no ya promesa y regalo cu el a haci hende.
Benny Sevinger ni sikiera a opta pa no hura pero haci un promesa den cual e lo a kibra loke el a priminti solamente hende, pero un portret grandi tabata mustra e momento, cu finalmente Benny Sevinger mester a bandona prison, pa evita cu e no mester a wordo huramenta y drenta Parlamento rondona pa wardador di preso y personal di seguridad manera exigencia ta ora un preso bandona prison.
A uza e pretexto cu Benny Sevinger no a wordo condena ainda dor di Huez pa e drenta Parlamento despues di eleccion.
Awor cu Benny Sevinger a wordo condena dor di Huez, ta uza e pretexto cu el a apela su caso sin splica Pueblo cu e sentencia di Huez den prome Instancia ta keda vigente te e momento cu posiblemente e sentencia wordo revoca dor di Corte di Husticia den apelacion.
Esaki a habri caminda pa Benny Sevinger ta parti di Parlamento di Aruba, a base di un huramento cu e no a priminti ningun hende nada, cu ta contradeci completamente e sentencia di Huez a base di un investigacion asina profundo, cu Huez a tene consideracion cu e tempo cu ya e mester a biba cu e mancha di acusacion di soborno, di acepta placa pa un fabor.
Pues di Huez kier a destrui Benny Sevinger, manera AVP awor kier uza pa comberti Benny Sevinger den martir manera AVP a haci tambe cu Mike cu a destrui Aruba cu su maneho, Huez lo no a tene cuenta cu su sufrimento como acusado den un caso cu a manda tanto hende prison pasobra nan a haya tereno na mal forma.
Kende e otro hendenan cu a bay prison ta? Nan ta hende conoci den comunidad. Miembronan den hopi caso di famia renombra na Aruba cu awe ta biba cu e dolor di e sentencia di Huez.
AVP ta defende nan tambe manera AVP ta defende Benny Sevinger contra tur regla? Unda consenshi a keda, ta e pregunta grandi. Consenshi pasobra kier haci kere cu Huez inhustamente a condena Benny Sevinger a base di e pruebanan cu el a ricibi (y a scrap loke el a bisa no tabata suficiente proba).
E presencia di Benny Sevinger den Parlamento di Aruba ta contradeci e huramento cu e mester a haci, uzando Nomber di Dios, cada bez cu como acusado y awor como condenado, ta den Parlamento di Aruba!
Representa Pueblo den Parlamento ta un asunto di consenshi enfrente Pueblo cu ta haci e Miembro di Parlamento su imagen enfrente mundo y e protector di su bienestar.
Ley ta proteha un Pueblo, un pais, riba tur tereno tambe riba tereno moral cu ta papia di consenshi, di loke ta bon y malo, di loke ta decencia y morto di decencia.
Un Huez ta dicidi kico ta bon y kico ta malo a base di Ley y investigacion.
Ora Huez sentencia un Muiembro di Parlamento na prison y un partido exigi pa e ta den Parlamento, ta duna Pueblo di Aruba e imagen di un criminal!
Unda consenshi di AVP a keda pa condena Aruba na imagen cu segun sentencia di Huez ta criminal?
