Docter cu a caba di pasa vakantie na Aruba a yuda rescata pasahero durante vuelo di regreso pa Miami

ORANJESTAD (AAN): Tabata Diamars 7 di September 2021 cu e vuelo di American Airlines 1028 a lanta for di Aruba, como 10 minuut prome cu tempo. 

Esey a socede debi cu e proceso pa pasaheronan subi abordo a bay rapido na Gate 5 di Aeropuerto Internacional Reina Beatrix.  Como cu pasaheronan a tuma nan asiento rapido den e Boeing 737-800 aki, a cera porta trempan, y despues lanta vuelo riba Runway 11 un poco despues rumbo pa Miami, Florida.

   Despues di 22 minuut, e avion a yega na su altura di 34.000 pia bayendo panort riba Lama Caribe.

    Un di e pasaheronan abordo ta e ciruhano Dr. Clement Qaqish, kende ta specializa como ciruhano di cara y cosmetico estableci na pueblo di Scripps Ranch, cerca di San Diego (California).  El a haci e viahe pa Aruba su so, pa tuma algun dia di vacacion.

   E vuelo tabata bayendo trankil, te ora cu diripiente un dama hoben abordo di e vuelo a cuminza bira malo, y hendenan sinta banda di dje a hala atencion di personal di cabina.  Nan a mira cu e dama hoben aki ta den problema serio cu salud.

   Dr. Qaqish no tabata sa nada di esaki, pero diripiente e personal di cabina a cuminza papia riba sistema di speaker, pa puntra si acaso tin un Docter of un Profesional Medico abordo di e avion, pa por fabor primi e boton di ‘Call’ pa notifica nan.

   Esey a pone mesora Dr. Qaqish a primi e boton, y personal di cabina a yega cerca dje, y pidi’e pa bay cu nan na e asiento di e pasahero cu tin problema.

   “E situacion a bira un poco grave,” Dr. Qaqish a bisa.  “E dama no tabata reacciona mas y tabata hala rosea den un forma cu realmente e mester di atencion medico.  E tabatin tambe un halamento dificil di rosea, pues nos mester a cuminza cu proceso di reanimacion, y pues nos tabata hala rosea pe pashent.”

   Meymey di e caos aki, Dr. Qaqish a cuminza cu CPR.  El a yega di traha den varios Sala di Emergencia na Hospitalnan, y a yega di ricibi training di Advanced Life Support.  Mientras e tabata haciendo esey, e tabata keda papia cu e piloto y via radio tabata comunica cu un Docter di American Airlines na tera.

   A keda determina cu no ta necesario pa haci un aterizahe di emergencia sea na Haiti, Republica Dominicana, of na Bahamas, pasobra e dama hoben a stabiliza su mes suficiente pa asina por a sigui cu e vuelo pa Miami.

   Mientras tanto e pilotonan a logra cu nan Boeing 737-800 a ricibi vectornan mas directo pa yega na Miami Airport, y aunke cu Miami tabata rondona pa awacero, nan a logra haya un espacio habri mey-mey di nubianan, y ya pa 5:55 pm e avion a yega na Gate D50 di American Airlines Concourse na Miami.  Esaki tabata 26 minuut mas trempan cu normal.

   Na Gate D50, un EMS Team di Miami a subi prome abordo di e avion, pa e paramediconan pone aparato di monitor na su curpa, y despues pone riba brancard y a baha cune pa bay cune cu urgencia pa Hospital local.

   Awor na San Diego, un canal local di CBS News a entrevista Dr. Clement Qaqish, kende a declara cu e reanimacion di emergencia no ta algo cu e ta haci tur dia, pero e training cu el a ricibi tabata mas cu util den e situacion aki.

   Y den pasado el a yega di yuda un otro pasahero tambe durante un vuelo.  Algun aña pasa e tabata viahando riba vuelo pa Hawaii y algo similar a socede, unda un pasahero a bay for di tino.

   Segun Dr. Qaqish, e tipo di casonan aki abordo di vuelo no ta inusual.  Hopi di su amigonan docter y ciruhano a conte cu nan tambe a haya nan ta duna un man pa rescata hende durante vuelo.

   Pero su esfuerzo pa salba bida di e dama aki riba e Diamars ey di 7 di September 2021 no a bay sin wordo nota.  Ademas di e cantidad di aplauso y palabranan di ‘thank you’ di demas pasahero- y personal di cabina, y e capitan, awor ta oficina principal di American Airlines na Dallas a manda un carta pa Dr. Qaqish pa gradici’e personalmente, y a hasta regale pasashi pa otro vuelo.

   E carta di American Airlines ta nota parcialmente: “Sin duda bo a mehora hopi un situacion dificil”.

   Pero Dr. Qaqish a bisa, cu tur esaki ta djis parti di dje di ta un Docter y un bon ser humano.

   “Semper ta bon pa yuda hende, y loke nos tabata haciendo ta yuda un hende na final di dia,” el a bisa.