En conexion cu Dia Internacional di Derecho di Mucha:
ORANJESTAD (AAN)- Matutino DIARIO a entrevista señora Michella Steenvoorde-Lacle, Beleidsmedewerker na Ministerio di Husticia y Asunto Social, y tambe Presidente di e Comision Plan di Mayor ken pa di tres aña consecutivo ta organiza e marcha pa Derechonan di Mucha, a duna informacion tocante e marcha cu ta bay tin Diasabra awor, 18 di November 2023, en conexion cu Dia Internacional di Derechonan di Mucha.
Lacle a menciona cu e añanan anterior e marcha tabata sali for di Plaza Habibe y tabata caba na Plaza Padu, pero e aña aki nan ta bay combine cu e actividad di Comision Vision Pedagogico, y lo saca e marcha for di YMCA San Nicolas, pa 2.30 or di atardi.
“Desde 3 or nos ta stel-op (alinea) tur e muchanan y sali di eynan y lo cana rechting macro (ruta di carnaval) y mitad caminda nos ta corta bay Carnival Village cu ta mas of menos 1.7 kilometer di canamento. E muchanan cu lo wordo invita ta tur scol na Aruba, di eerste te cu 6de Klas. Nan lo bin cu nan acompañantenan y nos lo parti e borchinan di nos derechonan na YMCA”, Michella a duna di conoce.
El a agrega cu cada grupo lo haya un borchi pa cana cu ne. e muchanan por bin uniforma, of cu blas pinta, etc. Esnan cu ta representa nan derecho na un forma mas creativo, cu ta resalta mas, lo gana un pizza pa parti cu scol.
“Aña pasa nos tabata tin e shownan riba stage, anto Pius-X a gana pasobra nan a bin representa e derecho di mucha pa no participa den guera, y nan a haci full un presentacion over di guera, etc. Nan a bin cu metrayeta masha lief mes. Tabata tin mucha cu a join e tik tok challenge, pero e aña aki nos a cay un tiki laat, y door di esey nos no a haci’e e aña aki, pero e muchanan por, e ora ey, expresa libremente nan creatividad”, Michella Lacle a splica.
