Director Joel Rajnherc:
ORANJESTAD (AAN) – Den entrevista cu DIARIO, director di Instituto Medico San Nicolas (ImSan), docter Joel Rajnherc, a referi na e hecho cu tin scarcedad mundialmente di un forma di jodium, cu ta necesario pa pone angua den wowo. El a comparti con na ImSan a logra haya esaki, y pakico ta necesario mantene un reserva pa casonan di problema agudo y cu ta rekeri di operacion no mas leu cu 48 ora. El a elabora tambe con lo atende cu e lista inmenso di spera cu tin pa operacion di catarata, cu e ta spera lo wordo reduci substancialmente, durante 2024.
Dr. Rajnherc a menciona cu un di e problemanan mayor no ta e remedi mes pa wowo, sino cu pa duna angua den wowo mes, mester desinfecta esaki cu un jodium cu ta special pa wowo.
El a duna di conoce cu mundialmente tin scarcedad di e jodium aki, tanto asina cu ni Merca, ni Europa, nos region no tabata hay’e. “Pero danki na e bon colaboracion cu nos tin cu varios compania farmaceutico un di nan a logra toch, pa haya un cantidad pa ImSan, y nos a cumpra un cantidad pa alomenos dura nos seis luna, anto nos ta sigur cu durante e lunanan ey no ta bay tin problema”, director di ImSam a señala.
ImSan a bay masha cauteloso cu e cantidad di jodium cu nan tabata tin, pa nan reserva esey pa e pashentnan cu tabata di emergencia. “Por ehemplo un pashent cu mester a wordo opera di un catarata cu no ta un emergencia, nos a postpone y nos ta bezig pa haal esey in. Awo nos tin cantidad suficiente na ImSan, pa cubri tur e operacionnan di wowo”, docter Rajnherc a splica.
El a bisa cu ora tin un problema agudo e persona mester opera den 48 ora, den mayoria di caso. E pashent no por warda mas y pesey ImSan a reserva e remedi menciona, pa e pashentnan agudo. “Pa pashentnan cu tin catarata, ta lamentable cu nos no tabata tin e remedi mundialmente, cu nos no a oper’e na e tempo cu nos a bisa cu nos lo a oper’e, pero awor nos ta bezig cu un inhale procedure” el a subraya.
