Aruba mester habri caminda pa un seguro medico priva atrobe? - *Na caminda pa 2030 mundo kier tene su mes na plan desaroyo di hende - *Gasto Cuido Medico no por baha gastonan di educacion y elimina pobresa
ORANJESTAD(AAN)—Na momento cu September acerca su fin, mundo ta drenta e ultimo trimester di 2021.
Un mundo na careda cu un grado halto di incertidumbre, ta trata di sigui dilanti a base di su plannan cu Covid-19 ta sigui ataca.
Na 2015, Nacionnan Uni a presenta e plan pa desaroyo duradero, sostenibel, di hende cu mester a yega na 2030 cu un calidad mucho mas halto di bida cu ta e caso te awor.
Mundo a uni den esfuerso pa elimina hamber y miseria y programanan di gobierno mundialmente tabata dirigi ariba 2030 durante cual nivel di bida mester a subi.
Na 2020, Covid-19 a basha tur plan di hende abou y mundo a cay den un shock. Den e situacion e planificacion mundial a continua y awe ainda Nacionnan Uni ta atende trabounan necesario pa haci nan plan realidad.
Mientrastanto, organisacionnan riba otro tereno, ta presenta nan preocupacion pa e realidad di Covid-19 na prome luga pero tambe na e loke cambio di clima lo por trece pa mundo.
Cambio di clima tambe tin efecto directo riba salud di hende y Cuido Medico cu ta bou un presion enorme di Covid-19.
Gastonan na tur pais ta sigui subi, manera siman pasa DIARIO a trece dilanti a base di investigacionnan special cu nos ta conduci pa yega na e base di loke mundo realmente lo mester spera como costo futuro di e pandemia Covid-19.
Salud di hende ta haya tur atencion y no solamente pa e hecho cu hende sin salud tin problema cu nan bida.
Cuido Medico ta sigui aumenta gastonan sigur pa motibo directo di Covid-19 y pa tur e resultadonan indirecto.
E miedo mas grandi cu ta existi ta, cu tur prioridad ta bay na Cuido Medico y mundo ta inverti mas den Cuido Medico cu den por ehempel Enseñansa y Eliminacion di pobresa.
Falta di educacion y pobresa ta dos di e factornan cu ta aumenta e gastonan di Cuido Medico, manera den e pandemia di Covid-19 tambe a keda demostra.
Pero con paisnan ta bay cubri tur gasto den un tempo cu entrada personal y nacional a wordo afecta?
Den e temporada di Covid-19, mas y mas Gobierno a asumi responsabilidad pa Cuido Medico loke a nifica gastonan nacional importante.
Mas ainda, ora seguro priva, a scrap na prome momento Covid-19 como gasto medico cu e ta cubri.
Na medida cu hende a cuminsa vacuna, seguro priva a cuminsa absorba e gastonan atrobe den hopi caso.
Awor otro factor ta bini dilanti.
Aruba ta un ehempel di seguro medico obligatorio cu a wordo introduci como e unico solucion pa tur hende por tin un seguro medico, cu antes tabata un responsabilidad di e hende mes, su dunador di trabou of relacion familiar, SVB y Gobierno pa hende sin entrada.
Na e momento aki, placa di e ciudadano no solamente pa medio di prima ta bay AZV pero tambe den sosten cu Gobierno mester brinda pa un cuido medico cu a causa un aumento di gasto riba tur tereno y cu hinca AZV cada dia den un problema mas grandi y ta menasa loke finalmente AZV por gasta.
Mientras vacunacion ta sigui y seguronan priva na un forma acelera ta amplia nan cobertura atrobe, pregunta ta keda mas cu nunca si Aruba no mester di un seguro priva banda di AZV.
Un persona cu no kier gasta su placa na placer pero na prome lugar na su salud, mester haya e oportunidad di participa den un seguro priva?
AZV por keda e unico poder financiero centralisa na Aruba mientras henter mundo ta busca solucion pa cuido, cu ta exigi personal mas cu tur otro entidad, gasto creciente pa comunidad?
Awe cu Covid-19 ta haci cu hende ta muri leu for di nan cas, no mester di sistema nobo di seguro pa enfermedad durante estadia of hasta morto den exterior?
Mundo mester atende cu un normal nobo.
Un normal diferente den cual realidad mester ta central y no emocion politico den un mundo cu na 2015 a planea un mundo di maraviya y awe mester soluciona mas pobresa, mas enfermedad, mas enemigo di bienestar di hende cu solamente por defende cu accion dirigi riba solucion efectivo.
