Directora Richella Dorothal:
ORANJESTAD (AAN)- Directora di Departamento di Inspeccion Tecnico (DTI), señora Richella Dorothal, a duna di conoce den entrevista cu DIARIO, cu for di momento cu e aviso a sali publica cu control di DTI ta cuminza, hopi persona a bin cerca nan, na bali, pa haci afspraak.
Entre diabierna te diamars nan a yega na 200 afspraak haci, pues un aumento drastico den un solo momento.
Richella a señala cu durante henter e aña DTI a haci yamada pa e personanan bin keur nan auto, teniendo cuenta cu e aspecto di seguridad tambe, pero aunke e no tin cifranan accesible na e momento aki, e ta calcula cu 50% di e autonan no tin keuring vigente, actualmente.
Esaki ta conta pa tur tipo di vehiculo, for di particular te cu transporte. DTI a informa riba e fechanan cu keurings-lokaal ta cera. Nan ta habri practicamente full December, cu excepcion di e dianan oficial di fiesta, cual ta dia 25-26 di December y 1-2 di Januari. Locual ta dia 27-28-29 di December lo ta habri y tin afspraaknan coriendo riba e fechanan aki. Lo habri bek pa publico dia 3 di Januari 2024. Dorothal a agrega cu DTI a atende cu e gruponan di carnaval, y a sinta informa nan tocante e exigencianan y rekisitonan pa cu DTI y tin un linea tambe cu ta cruza cu ta pa KPA cu ta haci e keuring di cierto carozanan y trailers.
