ORANJESTAD (AAN): Bo por mira con positivo e progreso pa e ser femenino a conoce cambio den historia di Aruba.
Kizas hopi hende no ta corda, cu mey-mey di siglo pasa, den decada di 1950 y tambe 1960, cu un ser femenino na Aruba tin di tuma retiro di su trabao, ora cu e drenta enlace matrimonial. Unavez cu bo ta casa, bo no tabata mag di traha ningun caminda.
Es mas, tin di corda cu muhernan na Aruba tampoco no tabatin derecho di voto. Tabatin un tempo cu hasta bo no tabata mira un ser femenino ta maneha un vehiculo tipo Pickup ningun caminda.
Pasobra esey ta un vehiculo cu hopi tabata pensa cu ta homber so por maneha. Tambe tabatin mas trabao cu casi bo no ta haya e ser femenino ta haci. Antes e trabao di labora banda di caminda, ta algo exclusivamente pa hende homber. Trabao di contratista pa verf of pleister, tambe ta exclusivo pa hende homber.
Por corda tempo cu ex-politico Faustina Frank (tempo di gloria di Partido PPA) den siglo 20, a cuminza cu campaña pa hende muhernan di Aruba y Antiyas haya mas cos di bisa riba nan isla! Hasta a start un campaña unda ta mira Faustina Frank operando un jackhammer banda di caminda.
Esey y mas, a habri caminda pa asina igualdad pa hende muher bira di mesun nivel cu e ser masculino. Tempo a cambia, y awor igualdad ta conta. Bo ta mira awor mas dama cu tambe ta banda di caminda ta haci e trabao aki, mas dama trahando den contratista ta verf, of pone azuleho. Tambe por mira nan ta corta yerba cu machine.
E discriminacion di sexo ya no ta existi mas! Algo di celebra! Aunke keto bay tin keho cu pago di salario no ta igual ainda pa e hende homber, y e hende muher.
