E fin di siman aki tin e di cuater edicion di Playa Film Festival

ORANJESTAD (AAN):  Fundacion CINEARUBA ta presenta e di cuater edicion di Playa Film Festival cu lo inicia e fin di siman aki.

E prome anochi ta diabierna 19 di juli, 8’or di anochi na Cas di Brenchie den Wilhelminastraat, Playa.

            E programa di diabierna ta consisti di peliculanan di arte, peliculanan cortico internacional y peliculanan di Kingdom of Short cu ta un competencia di peliculanan cortico di ficcion for di Aruba, Bonaire, Curaçao, Saba Sint Maarten, Sint Eustatius y Hulanda.

            E di dos dia di e festival cu ta diasabra 20 di juli lo inicia cu un tayer di traha pelicula cortico den un minuut y den un solo take. E tayer gratis aki lo wordo duna den e parke di Brenchie Arends for di 6’or di atardi te cu 7’or di anochi.

            E anochi di diasabra ta sigui cu mas peliculanan for di e segundo parti di e programa di peliculanan cortico di arte, internacional y Kingdom of Shorts. Porta ta habri 7:30 di anochi pa tur dos anochi. E publico presente tin e oportunidad pa vota pa e miho pelicula premio publico.

            E festival lo culmina na Santos unda lo bay saca e ganadornan di e miho pelicula internacional y di diferente categorianan di premio pa Kingdom of Shorts cu ta miho pelicula premio hurado y publico, miho actor, miho actriz, miho director y miho cinematografo.

            Pa mas informacion por bishita playafilmfestival.com.