Director di ATIA Herrick Henriquez
*E lo yuda nos economia y caha di gobierno
ORANJESTAD (AAN) — Director di ATIA, Herrick Henriquez a subraya cu invoerrechten tabata un di e motibonan pa cual ATIA tabata boga pa un BTW, y ainda nan ta pro esaki.
“Pero un BTW bon structura; un saver BTW literalmente tin cu kita invoerrechten. Suriname a haci’e asina”, director di ATIA a bisa.
El a agrega cu Suriname a kita tur invoerrechten y a wal prijsnan subi den algun lugar, pero a yuda cu subsidio. “Pero nan a pone un BTW di 10% y awo nan ta mirando e frutonan di dje”, Henriquez a expresa. E ta kere cu na Aruba mester yega na esey pero ki tempo e no sa y no ta mira cu e ta bay pasa pa awo. No obstante e mester yega na e stap aki un dia pasobra e ta yuda e pais su economia, incluyendo caha di gobierno, segun Henriquez ta insisti.
“Ami no ta un experto den belasting pero mester wak si e sistema por handl’e, mester wak tambe e parti di comercio, pasobra a propone dos tarifa; mayoria computer system por handle un tarifa. Algun so por handle dos, y ora bo tin un BTW bon structura, tur e excepcionnan cu tin awo cu BBO no mester tey mas. Eigenlijk, e duro ta cu bo tin cu bay pone un BTW riba coriente y awa, y kico ta bay pasa ta cu e grootverbruikers tin cu bay paga mas, y e hendenan cu awo caba ta subsidia y cu no por paga, bo tin cu sigui subsidia pero na un otro manera. Pues, e parti ey ta un parti cu nos kier pa mehora e economia, y nos ta spera cu un dia e lo bay pasa, pero mester tin sosten di pueblo, comercio y gobierno”, Herrick Henriquez, director di ATIA a remarca.
