E ekipo di 'Chef de Mission' di Comite Olimpico Arubano a reuni den preparacion pa 2025

ORANJESTAD (AAN): Comite Olimpico Arubano a duna di conoce cu den cuadro di preparacion pa e eventonan den Ciclo Olimpico binidero,

a cuminsa e reunionnan general di e Chef de Mission, unda e 4 nan cu a ser escogi despues di un proceso di solicitud algun luna atras a cuminsa e proceso di planificacion general.

            E intencion ta pa traha den ekipo apesar cu cada Chef de Mission lo lidera un evento diferente. Asina ki por percura pa tur cos cana bon, combinando e experiencia di esnan cu a eherce e tarea anteriormente cu e entusiasmo cu esnan cu awor pa prome biaha lo haci e tarea aki pa COA.

            E proceso pa e inscripcion pa e weganan Panamericano Junior Asuncion 2025 a cuminsa, y usando e informacion di esaki a elabora e planificacion cu ta inclui e parti administrativo, financiero y tecnico.

            Banda di esaki, lo pone mas enfasis riba e cobertura di e atletanan prome cu e wegananan, hunto cu e team di media cu ta yuda cu e cobertura total durante e eventonan.