WILLEMSTAD: Un accident basta fuerte a keda registra Diahuebs marduga pa 12:55 am riba Schottegatweg Oost na isla di Curaçao.
E accident banda di cruzada cu Kaya W.F.G. Mensing tabatin como resultado di e auto sedan cu a bay dal den e tubo diki di Luz di Trafico, ta cu un persona hoben a perde su bida, y por lo menos tres persona a keda herida.
E prome unidad di Polis cu a yega, a pidi pa presencia mas urgencia di Ambulance. Esey ta debi cu e victimanan tabatin hopi golpi, y uno di nan no ta duna señal vital mas.
Paramediconan cu a yega, a bin topa cu un situacion cu cada uno di e victimanan tin golpi y multiple trauma na nan curpa. Ta comosifuera cu e auto a slip na forma violento y dal cu tur su furia na banda di pasahero den e tubo diki. Autoridad no a bisa si nan tabatin seatbelt bisti, pero mirando e golpinan aki, ta parce cu esey no tabata e caso.
E auto a kibra bastante, y a laga casi tur cu heridanan cu tabata sangra profusamente, incluyendo e chauffeur.
E persona sinta dilanti banda di e chauffeur no tabata duna señal mas di bida. Polis a tende diferente testigo, y tur tabata conta con e auto tabata coriendo velocidad extremadamente halto, y diripiente e auto a dal den acera banda drechi, bay den scual, kita na man robez y bay dal contra di un tubo diki di Luz di Trafico.
El a dal net na e asiento unda e pasahero dilanti tabata sinta, y lo a fayece instantaneamente. E victima a wordo identifica como Thishaily Esmatil Olivo Rodriguez, di 16 aña di edad, naci na Republica Dominicana.
E chauffeur a keda gravemente herida y cu Ambulance a wordo hiba Hospital den situacion critico. E dos personanan sinta patras tambe a wordo hiba Hospital pa tratamento medico. Polis ta sigui cu investigacion.
