E destaho publico pa scohe un arkitecto pa renoba Wilhelminastraat y su vecindario a cera

Minister Wever:

ORANJESTAD (AAN): Despues cu na october, Minister di Finansa, Asunto Economico y Sector Primario, Geoffrey Wever, hunto cu Prome Minster Mike Eman y Minister di Infrastructura, Rene Herde, a anuncia oficialmente e apertura di un destaho publico pa selecciona un bureau di arkitectura pa traha un diseño integral pa e proyecto di embeyecemento di Wilhelminastraat y su vecindario, awo ta anuncia cu esaki a cera.

   Siete bureau di arkitectura  a inscribi y a traha riba nan plan visual pa e area. Diahuebs proximo un comision forma pa e tres ministernan y cuater comerciante di Wilhelminastraat lo scohe e plan mas bunita y mas integral, a base di criteria cu a crea specialmente pa esaki, pa asina e arkitecto cu gana e proyecto por prepara e diseño final, bestek y demas documentonan cu ta necesario pa por ehecuta e trabao di construccion. 

   E proyecto ta forma parti di e esfuerso continuo di Gobierno di Aruba pa revitalisa e centro di Oranjestad, stimula comercio y stimula cu Oranjestad ta bira un centro tin vivienda, gastronomia, oficina y retail. E iniciativa ta abarca e area di Wilhelminastraat number 49/62 te cu e crusada Wilhelminastraat/ Kazernestraat (excluyendo Plaza Daniel Leo), y tambe e zona di Klipstraat/Oranjestraat, incluyendo Rifstraat y Schoolstraat.

   E diseño cu lo sali ganador for di e encargo aki lo sirbi como base pa implementacion di un plan di embeyecemento structural y estetico, cu tin como meta pa haci Oranjestad mas atractivo pa comerciante, bishitante y ciudadano.

   “Nos ta keda enfoca pa crea un Oranjestad moderno, vibrante y sostenibel. E destaho publico aki ta un paso concreto den e proceso di renobacion urbano cu nos a compromete nos mes pa realisa,” Minister Wever a declara.

   Cu e destaho publico aki, Gobierno di Aruba ta reafirma su compromiso den e Programa di Gobernacion AVP-Futuro 2025-2028 pa revitalisa e centro di Oranjestad, creando espacio pa crecemento economico y bienestar di nos comunidad.