Lo conecta Aruba direct cu Medellin - ORANJESTAD (AAN): E aerolinea Avianca lo habri aña nobo cu 23 ruta internacional nobo den continente Americano,
como parti di nan recuperacion despues di a usa ley di bancarota di Merca.
Segun Avianca, lanzando 23 ruta nobo ta demostra cu nan kier sigui crece di forma sostenible y cu nan tin e meta firme di sigui di ta e aerolinea cu e red di ruta mas robusto den e region.
Aworaki mes, Avianca Holdings, cu ta inclui e aerolinea na Colombia y su sucursalnan na Ecuador y Centro America, tin 99 ruta entre nacional y internacional den cual ta ofrece mas di 2.680 vuelo y un oferta di casi 400.000 asiento semanal.
E paisnan cu mas crecimento di vuelo nobo lo bay ta Colombia, Ecuador, Costa Rica, Guatemala, y El Salvador.
RECUPERACION:
Despues di e cancelacion di rutanan causa pa e crisis di mercado mundial di aviacion debi na pandemia di Covid-19, Avianca a habri e aña aki rutanan internacional Medellin pa Cancun (Mexico), Medellin pa Punta Cana (Rep. Dominicana), Miami pa San Jose (Costa Rica), San Salvador pa Ontario (Canada), y Cali pa Orlando (Florida), ademas di ruta nacional entre Pereira y Santa Marta.
E compania cu tambe ta bula pa Madrid y Barcelona, varios ciudad di merca y Zuid America, a bisa cu pronto nan lo cuminza vuelonan directo entre Bogota y Toronto (Canada).
Avianca lo ofrece tambe vuelonan directo di Cali pa New York, pa Cancun, pa Mexico City, pa San Jose, pa Quito.
Tambe lo bin cu vuelonan directo di Medellin pa Aruba, pa Mexico City, pa Orlando, pa San Jose, pa Quito, y pa Guayaquil, y desde Bucaramanga pa Miami.
E crecimento di mas grandi na Colombia lo bay ta principalmente na ciudadnan otro cu no ta Bogota, debi na limitacionnan persistente di nan terminal aereo, y tambe limitacion den infrastructura. Pesey Avianca kier aumenta vuelonan directo di otro ciudadanan, y esun di Medellin pa Aruba lo ta uno di gran alivio.
Encuanto Costa Rica, e plan di expansion ta pone vuelonan directo di San Jose pa Los Angeles, New York, Mexico City, Managua, Cali, y Medellin.
