Parlamentario Hoek di MEP cu mensahe pa AVP:
ORANJESTAD (AAN)- Parlamentario señor Ricky Hoek, den conferencia di prensa reciente, a referi na e situacion reinante cu e guera entre Rusia y Ucrania, cu ta pone presion riba mundo henter.
Hoek a comenta cu apenas mundo a caba di sali for di un pandemia di casi dos aña, cu e economia, finanzas, y parti social a worde afecta gravemente, y aworaki tin otro situacion cu ta amenaza nos tur y cu tin efectonan negativo riba e situacion actual.
“Danki Dios, mi tin cu bisa cu ainda nos no a sinti efectonan directo, pero mi kier concientiza pueblo cu na largo plazo, e siman y lunanan cu ta bay bin, nos ta bay sinti algun consecuencia indirecto di e guera cu tin entre Rusia y Ucrania”, e parlamentario a subraya.
Den e contexto aki Hoek kier pone atencion riba e prijs di crudo cu ta aumentando drasticamente, y door di esaki hopi producto ta bay bira mas caro, entre otro e gasoline pa transporte.
E parlamentario a informa cu tanto Gobierno di Aruba como e fraccion di MEP como di Raiz ta den deliberacion pa wak kico ta tur e posibilidadnan cu por tin pa mitiga e efectonan cu tin riba e gastonan hopi halto cu ta na caminda pa Aruba.
Hoek a expresa cu Aruba no por sali for di esaki, pasobra no ta den nos pais su control ni den su man pa stop e guera.
“Loke si nos por haci ta sea pro-activo y cuminza pensa riba solucionnan, cu ta na bienestar di nos pais. Y pesey, mi kier bisa tambe cu lamentablemente nos a ripara cu partido den oposicion AVP, a sali den full page cu henter su elenco, tur e parlamentarionan sinta hunto, ta bisa cu nos ta creando pobreza na Aruba, pero sinembargo esaki no ta e realidad. Nos no ta creando ningun pobreza pasobra no ta nos ta ocasiona e problemanan global cu henter mundo ta sufri di dje”, Parlamentario Ricky Hoek a señala.
Hoek a manda un mensahe pa fraccion di AVP, pa mescos bay sinta den bloke na Parlamento y trece solucionnan, pasobra e ta kere cu den situacionnan global tanto den un pandemia, como awo, den situacion di guera, un Parlamento di 21 persona mester busca solucionnan cu ta na bienestar di Aruba henter y no di un hende of un grupito.
