Errol de Freitas, Presidente SNBA:
ORANJESTAD (AAN) Errol de Freitas, Presidente di Asociacion di Comerciantenan di San Nicolas (SNBA), den entrevista cu Matutino DIARIO a duna di conoce cu dos siman pasa, SNBA wordo invita na Conseho di Minister pa un reunion breve, pero esaki a dura mas cu un ora.
Durante e reunion aki nan a cuminza discuti e vision pa San Nicolas. “Mi mester bisa cu e reunion a bay den un bon atmosfera, tur minister tabata presente, y nos a intercambia, pero naturalmente esey no tabata suficiente tempo. Anto nos a planea e dia ey cu nos lo tin un follow up”, De Freitas a duna di conoce.
El a agrega cu SNBA a organiza un Conseho di Ministro na San Nicolas, cu a tuma lugar na Kulture Café, pero nan ta ocupa cu e reunion ariba menciona cu ta programa pa diabierna 5 December, y De Freitas ta spera cu e lo tuma lugar.
“Pero bo mester ta flexible; ultimamente mi no tin problema si nos por hacie na Januari tambe. Pero mi tin cu bisa cu e combersacionnan bay bon”, De Freitas a subraya, y a remarca cu e atmosfera cerca e ministernan ta saludabel.
El a agrega cu nos ta drentando den Luna di December, unda nan ta organizando e Feria di Pasco, cu speranza cu nan ta keda haya cooperacion di nan sponsornan.
