Director di DOW ta splica tur e retonan pa loke ta RWZI;
ORANJESTAD (AAN)-- Pa loke ta trata RWZI, Ing. Marlon Croes a bisa cu ta conoci cu DOW ta bezig den ‘stuur groep’ pa haci overdracht na Utilities Aruba NV, y e documentonan ta cla.
“Raad van Advies a saca su conseho di dje y nos ta trahando hunto cu DWJZ, pa eynan pronto lo bin cla. Nos ta spera cu pronto esaki wordo entrega na Parlamento y aki pa por wordo agenda pa nos por trate ainda. Esaki ta den man di Parlamento pa wak ki dia e por tuma lugar. Pero nos ta papiando pa wak si e por wordo trata mas lihe posible”, Director di DOW a reitera.
El a agrega cu nan ta yega eynan, e ora ey lo tin espacio financiero na Aruba Utilities NV, pa por hinca den e planta di biaha. “Y asina por cuminza cu e destaho publico pa bin cu un planta nobo cu tin un capacidad mas grandi pa por procesa bay pa 15.000 cup pa dia, y pa procesa awa den termino bactereologico, y tambe nutriente, cu ta hopi miho pa medio ambiente y salubridad publico”, Ing. Marlon Croes a señala.
Croes a menciona cu otro reto cu nan ta topa cu ne ta cu na Bubali Plas e awa ta hopi halto, y ora tin awacero tur hende ta ripara cu Sasaki ta yena full di awa, mescos cu e bario San Miguel.
“Y e awa ta subi di e halto ey cu e tuberia di e riolering for di High Rise Corridor ta bao di awa, y e tubo aki ta di asbesto tambe, cu tin su añanan y tin skeur, y e awa a yena e tuberia aki y bin na e planta bek, y bo ta haya un cantidad di awa cu ta keda circula, via e tubo, den e planta y den bek na Bubali Plas”, director di DOW a comenta.
El indica tambe cu nan a reuni cu un team di CMO, y a combersa cu DVG, cu Ministerio di Medio Ambiente, y cu Ministerio di Infrastructura mes, pa busca un solucion structural pa esaki.
“Y nos a haya aprobacion di Ministerio di Naturaleza y Minister Presidente pa nos por habri e sluits bao cierto condicionnan. Esaki nan ta cu nos ta habri’ e 3’or y cere 3’or di mainta bek, prome, despues y durante cu habri sluits nos ta tuma muestranan di e awa den Bubali Plas, den e salida di lama, y 100 meter pafo tambe, pa nos monitorea cu e awa aki no ta afecta nos lama, den sentido bacteriologico”, director di DOW, ing. Marlon Croes a relata.
Esaki a tuma lugar y bao e condicion menciona nan a habri’e y mainta DOW a wordo informa cu a yega na e nivel pa nan por opera normal bek, y nan lo a informa e team den e curso di dia, pa no habri e sluis mas den e dianan nos dilanti y monitorea e situacion pa cu esaki. Den e luz aki nan a cuminza cu trabaonan pa remove e awa y asientonan for di Bubali Plas pa yuda baha e awa y solo yuda purifica e awa.
