*Nan a haya presentacion di e proceso con pa traha ley
ORANJESTAD (AAN) – Studiantenan di Bachelor-4 na Universidad di Aruba (UA), di e Facultad di Trabao Social & Desaroyo, a bishita Parlamento pa wak y haya informacion, con e proceso di trahamento di ley ta tuma lugar. Ta trata di Evilienne Werleman y Jonathan Trinidad di Lecturer Department di Trabao Social di U.A, cu hunto cu nan klas a representa nan Facultad.
Evelienne a menciona cu nan a haya un les, unda nan a haya sa mas di e proceso di con leynan ta wordo forma, con decisionnan ta wordo tuma, y pa haya un perspectiva con e ta pasa den realidad e teoria cu nan ta siña na scol.
Esaki a sosode tambe den presencia di Parlamento y Prome Minister mr. Evelyn Wever-Croes. “Eigenlijk, nos ta futuro trahador social, pero ta hopi importante pa nos sa riba un nivel hopi mas amplio y con nos por ta un diferencia den comunidad den procesonan di trahamento di leynan, protocolnan, polis, pasobra esaki ta bay yuda nos den futuro cu nos clientenan, pa nos haci un diferencia den nos comunidad riba un nivel hopi mas grandi”, Evilienne a indica.
E hoben a agrega cu esaki ta nan delaster aña, y na Juni 2024, 11 di nan ta bay drenta e veld como Trahador Social nobo.
“Aworaki tin diferente problema social cu a surgi despues di e pandemia, y e aspecto interesante di nos ta cu nos ta Trahado Social cu ta bin di un background cu nos tin diferente perspectiva, riba kico e trahado social ta. Nos por papia cu hende, nos ta traha cu famia, comunidad y tambe pa aboga pa derechonan humano, y cosnan mas grandi cu un perspectiva so”, Werleman a subraya.
