DOW ta evaluando cua ta e miho opcion pa drecha dam di Rooi Afo

Francis Gomez di DOW:

ORANJESTAD (AAN): Den un entrevista reciente cu DIARIO, señor Francis Gomez, Hefe di departamento di Ontwerp y Planning (O&P) di DOW, a duna detaye tocante e situacion actual di e dam di Rooi Afo. DOW ta sigui monitoria e situacion despues di a tuma e decision pa cera e dam temporariamente.

   Señor Gomez a enfatisa cu un di e mayor preocupacionnan ta cu e vangrails cerca di e dam a cuminsa move, lo cual por crea un riesgo. Adicionalmente, parti di e talud a kibra, causando cu ora tin hopi yobida of ora e awa ta subi, e ta ‘erode’ e tereno, creando un posibilidad cu e por sak y forma un peliger. DOW a evalua seis opcion pa por yega na un decision riba cual ta e miho alternativa — tanto desde punto di bista tecnico como logistico y economico — y tambe pa mira cual opcion por implementa lo mas lihe posibel.

  Señor Gomez a bisa cu prome cu a cera e caminda, DOW ya tabata trahando riba varios plan estrategico pa aborda e problema. A haci evaluacionnan detaya pa yega na un solucion economico, duradero y sigur.

   DOW ya a solicita un aanlegvergunning (permiso di construccion), pa asina ora e trabounan cuminsa, tur permiso necesario ta cla y e proyecto ta considera tambe e aspecto di naturalesa y medioambiente.

  Señor Gomez a agrega cu e evaluacion di e diferente opcionnan lo keda cla den e aña aki, y e ehecucion di e trabou ta programa pa 2026. Fondo pa mantenimiento ya ta disponibel, y DOW ta warda e aprobacion final di Gobierno, pa asina por termina e planificacion logistico prome cu inicia e obra.

   Pa esnan cu ta uza e awa di e dam, señor Gomez a aclara cu e intencion ta pa e uzo di e dam por sigui durante e periodo di trahou, mientras e trabounan ta tuma luga.