ORANJESTAD (AAN): Presidente di HAVA, esta Dr. Juaquin van Trigt a indica cu nan ta contento di por a yuda lanza par di video pa yuda den e trabao pa informa tur hende, pa concientiza ciudadanonan con improtante ta pa busca vacuna.
Segun Dr. van Trigt, nan ta hopi contento con e animo ta na Aruba pa cu e vacuna. Ta conoci cu otro pais den region cu no ta yegando porcentahe di hende vacuna cu Aruba si tin. Pues ta contento cu esey, pero toch ta ripara cu mester keda conciente y activo.
Segun Dr. Juaquin van Trigt, el a ripara cu tin grupo ainda cu kizas ta dudando, of tin pregunta ainda, of kier warda tiki mas pa nan dicidi si ta bay acepta e vacuna.
Pa e meta aki a lanza e videonan aki pa asina duna hendenan tiki mas siguranza cu e vacuna tey pa yuda pa sigui manda Aruba dilanti y sali for di e pandemia realmente, pa spera cu mas rapido posible yuda Aruba progresa.
Hecho ta cu tur dia Docternan ta papia cu pashentnan, y ta haya variedad di pregunta di publico riba e tema aki. Impresion cu Docternan ta hayando ta cu na Aruba tin un grupo cu no a vacuna ainda, tin falta di informacion.
Sin lubida cu tin un grupo cu ta realmente contra dje, y tin duda den henter e procedimento cu e vacuna a cana. E grupo ey ta chikito y minusculo, pero tin voz hopi grandi.
Pero e grupo cu HAVA kier target awor pa yuda cu informacion, ta e grupo cu a warda y ainda no tin suficiente informacion di e vacuna, y kier sa mas.
Tambe Docternan ta hayando pregunta encuanto e funcion di e vacuna, y e pregunta di con ainda tin hende cu ta sali positivo despues di haya tur dos dosis. Tambe si acaso tin di bay sigui tuma vacuna den futuro cercano.
Dr. Van Trigt a bisa cu pa e isla libera su mes di e pandemia, ta cu hopi tin di wordo haci. E vacuna ta parti di e solucion, y e no ta e unico solucion. E combinacion di vacuna e grupo di riesgo y esnan rond di nan, y e media di social distance, y tin di enfatiza cu no pro kere cu lo por bay bek na e situacion manera biba antes.
Tin di keda conciente cu e virus ta keda biba entre nos, pero e virus ta perde su caminda di bay pasobra nos ta bira conciente di dje.
Tapaboca tambe ta imporante cu ora bo ta den grupo grandi paden, corda bist ibo tapaboca y mantene distancia. Si bo tin sintoma, corda bay test. Corda cu e vacuna ta yuda, pero e no ta garantizabo cu e no ta haya Covid mas. Corda cu si bo tin sintoma hasta cu bo a vacuna, bay test y mantene bo mes na protocolnan di DVG.
