ORANJESTAD (AAN): Diahuebs mainta, Minister Armando 'Rudy' Lampe a yama su ultimo conferencia di prensa como minister encarga cu e cartera di Enseñansa y Desaroyo Sostenibel.
El a cuminsa bisando cu diaranson atardi, el a haci entrega di e cartera referi na Desaroyo Sostenibel na Sr. Geoffrey Wever, cu ta e minister nobo den Gabinete Wever-Croes II.
Lampe a entrega Wever e documentonan concerni hunto cu raportnan den USB stick cu tur informacion y na mesun momento a dese'e hopi exito.
Durante e encuentro, a bisa, a splica Geoffrey Wever cu ora cu el a bira minister di Desaroyo Sostenibel e no a haya nada, pasobra no tabata tin ningun departamento cu ta cao bao di dje, ningun personal ni ningun presupuesto.
Na e momento ey tambe a haya TNO cu a cuminsa 'come' for di e presupuesto di Enseñansa y pesey un dado momento financieramente e no tabata sostenibel y conhuntamente cu Hulanda a dicidi pa no continua cu e protocol di cooperacion cu TNO na 2019, a señala.
Segun Lampe, semper mester tin un vision a largo plazo y pesey a combersa riba e economia circular 2050 cu cual el a duna contenido na loke ta e guia cu mester tin pa tur otro ministerio.
A mencion'e cu e palabra nobo pa desaroyo sostenibel ta economia circular. Durante e gobierno aki tabata tin diferente conferencia riba e tema di desaroyo sostenibel.
Rudy Lampe a sigui bisa cu Geoffrey Wever a inform'e cu ta bay cay bao di su ministerio Bureau Medicinal Cannabis pa asina duna na esaki continuidad.
El a reacciona si bisando cu e tema di cannabis no haya contenido y cu te hasta durante e discurso di gobernador e siman aki e tema no a wordo menciona.
E ta spera cu awor cu Bureau Medicinal Cannabis ta bay cay bao di Minister di Desaroyo Sostenibel ta hopi importante pa e lucha pa e continua y pa por realisa un pilar economico nobo aki na Aruba.
