Directora di SKOA ta anuncia aumento di scolgeld  entrante aña escolar 2023-2024

Kleuter lo bira 250 Florin, Scol basico 275, MAVO 350

ORANJESTAD (AAN)— Anuesca Baly, directora di SKOA, a declara den entrevista cu DIARIO, cu desde aña 2015 SKOA no ta ahusta e scolgeld y mirando cu tur gasto ta sigui subi, y no ta descarta cu e costonan di awa y coriente lo subi mas, y ademas e material cu ta wordo uza den scol.

SKOA a haci un ahuste of aumento, riba locual nan ta paga normalmente, pa tur grupo; esta, kleuterschool, scol basico y MAVO. E ahuste (aumento) pa Kleuterschool ta 75 florin ( e ta bira 250 fls), pa scol basico ta 100 florin (e ta bira 275 florin) y pa MAVO ta 125 florin (e ta bira 350 florin), cu lo drenta na vigor entrante aña escolar 2023-2024.

Esaki ta solamente pa scolgeld. E no ta inclui aircogeld.

Anuesca Baly a reitera cu e ahuste aki no ta bin sin deliberacionnan, pa motibo cu tur cos ta birando mas caro, y na cierto momento mester tuma decisionnan cu pa ningun hende ta agradable, pero mester hacie pasobra gastonan di scol ta subi y scol mester cubri nan gastonan.

Esey no ta kita cu SKOA ta zorg pa mayornan cu tin dos of tres yiu cu ta alumno un di su scolnan, por haci areglo di pago, manera semper.

E areglo di pago ta core pa henter un aña escolar, y e ta habri dia 1 di April te cu 30 di Mei un aña despues, cu e mayornan mester cumpli cu tur e pagonan cu nan mes indica, con nan ta pague.

SKOA ta pone un suma minimal cu mayor tin cu paga pasobra tin cu tin cuater of cinco yiu na scolnan di SKOA. Riba e base ey nan por haci un areglo y nan mes ta wak cuanto nan por pone of kita. Tur e rekisitonan mester wordo cumpli cune prome cu e aña escolar nobo habri.

Ya pa dia 1 di Maart, SKOA ta cuminza cu e reinscripcion pa e aña escolar nobo. Mayornan ta haya chens pa cuminza durante e reinscripcion pa cumpli cu nan pagonan di e aña escolar vigente, pa por haci un areglo di pago nobo.

Tur mayor cu ta cumpli cu areglo di pago, automaticamente ta bin na remarke pa haya un areglo di pago nobo, Anuesca Baly ta reitera.

Mayornan cu no a cumpli pa x motibo, y tin aviso, lamentablemente no ta logra, automaticamente, un areglo di pago. El a reitera cu areglo di pago ta core pa full un aña escolar, pues mayornan tin tempo suficiente pa acudi na SKOA pa menciona pa ki motibo no ta cumpliendo cu esaki.

El a agrega cu SKOA di su banda ta duna mayornan tur update y manera cu mayor haci su pago e ta haya un update via e sistema di SAF, y si e falta pa paga ainda riba su cuenta cu ta habri, e ta haya tambe un recordatorio cada tres siman cu e fecha cu e mes a indica cu e mester cumpli cu su pago, a pasa.

Baly a agrega cu banda di esey tambe SKOA tin bon relacion instancianan cu ta yuda alumnonan cu a bin for di exterior y ta acudi na scolnan di SKOA, entre otro Cruz Cora cu ta yuda alumno y mayornan, mescos cu e grupo cu DAS ta yuda. Tur esaki, logicamente ta bin cu su rekisitonan y mayornan mes tin cu haci peticion pa haya yudanza.