ORANJESTAD (AAN) – Fundacion pa Nos Grandinan, Centro Kibrahacha, a reuni cu Formador Evelyn Wever-Croes,
den e cuadro di e encuentronan cu stakeholders externo, y den contexto di e proceso pa formacion di gobierno nobo.
Sigui na e reunion a tuma lugar e conferencia di prensa di rigor, unda señor Jeffrey Matos, director di e Fundacion a relata tocante e reunion aki.
Jeffrey Matos a menciona cu Fundacion pa Nos Grandinan, Centro Kibrahacha a haya e oportunidad di reuni cu Formador y nan ta gradici pa esaki.
El a expresa cu e Fundacion ta hopi satisfecho, cu Aruba ta bay haya un minister pa atende cu e cartera di nos grandinan, y esaki sigur ta un beneficio pa e grupo cu e fundacion ta sirbi, cu ta nos adultonan mayor, y esaki ta un noticia hopi positivo cu nan a scucha den e encuentro cu Formador.
Señor Matos a participa den e reunion cu formador acompaña pa su colega Kelsey Arends y e Presidente di e Raad van Toezicht, y hunto nan a trece nan pensamento dilanti cerca Formador.
Nan a elabora riba diferente proyecto cu e fundacion ta bezig cu ehecucion, y tambe e trabaonan cu nan ta realiza pa hopi tempo, pa e adultonan mayor.
“Kibrahacha, pa 36 aña brindando un centro di actividad pa nos hendenan grandi di tur distrito di Aruba, nos ta ofrece nan servicionan di transporte y actualmente nos ta trahando hunto cu stakeholders y partnernan, riba temanan; nos a organiza momentonan di informacion, salud, educacion, pero tambe e parti di tecnologia cu nos ta kere ta hopi importante pa nos grandinan. Tambe nos tin proyectonan den preparacion, unda cu nos ta kere cu e contacto cu nos hendenan grandi ta hopi importante, mescos cu nan acceso na informacion. Pronto nos lo anuncia esakinan, pero nos a comparti sigur cu Formador, pa asina e ta na haltura kico ta e tareanan cu nos ta bezig ta desaroya, actualmente, na Aruba”, señor Matos a señala.
Finalmente, e fundacion a bisa e Formador, cu ta hopi importante cu den futuro, na momento cu un hende grandi bay cerca un dunador di cuido, tin un relacion entre e dunador di cuido y e aspecto social. Na momento cu un grandi bay cerca un dunador di cuido, cu e por distingui hopi lihe kico ta su necesidadnan. “Hopi biaha ta necesidadnan social, contactonan social, pa evita cu na dado momento, nos grandinan cay den soledad. Ta puntonan cu nos ta kere cu e ministernan nobo por tene cuenta cune den futuro”, Jeffrey Matos a relata.
