Julie Wever, Director Tecnico y Comercial di FCCA cerca Formador:
ORANJESTAD (AAN) – Minister Presidente y Formador mr. Evelyn Wever-Croes, continuando cu su encuentronan cu stakeholders externo, Fundacion Cas Comunidad Arubano (FCCA), como parti di e proceso di formacion di Gabinete Wever-Croes II, a reuni cu Fundacion Cas Comunidad Arubano (FCCA), representa pa señora Julie Wever, Director Tecnico y Comercial di FCCA, y e Director señor Giovanni Anthony.
Señora Wever a duna su declaracion den conferencia di prensa, tocante e reunion aki cu Formador Wever-Croes, y el a señala cu e reunion a bay hopi bon, FCCA a wordo bon ricibi, y e temanan cu nan a trece dilanti a cay na bon agrado, y e ta sigur cu e fundacion a logra hopi, cu trece su puntonan dilanti, como cu ta puntonan cardinal, pasobra FCCA ta abarca e “volkshuisvesting” (vivienda) cu ta hopi importante pa Aruba. Den e reunion, tabata hopi duidelijk cu mester tin hopi mas “samenwerking” den diferente aspecto, manera e parti social y tambe con nan ta bay mantene e cohesion den bario, y con pa traha barionan cu ta fit den e comunidad di awendia, cu tin tambe tur cos den dje: fauna, flora, casnan di calidad, y cu nan por duna e miho na e pueblo.
Tambe a trata e tema di con pa yega na un miho financiamento di vivienda, con FCCA por yuda pa cada persona por yega mas facil na nan cas, y e problemanan economico di awendia, cu Covid-19 por a trece retonan nobo, cu tin cu deal tur dia y gara nan na “nan cacho”, pa nos pueblo por sali di e periodo aki, lo miho posible.
“Pa FCCA, e problema cu Covid-19 a trece cune, a afecta trahamento di cas, tur e gastonan a bira hopi mas grandi, pero tambe pa nos comunidad cu hopi hende a perde nan trabao, a bay gana menos, y tur esaki ta un reto pa nos tur por cumpli hunto, cu nos debernan tur luna”, señora Wever a subraya.
E dama a comenta cu FCCA tin su debernan pa cumpli cu nan; tambe nan tin e huurdonan cu tur hende mester wordo acapara, y ta un di e retonan cu a trece dilanti na Formador. Pero no ta solamente retonan sino como pa sali di nan; y yega na miho solucionnan y cu mañan tur hende por sigui paga.
FCCA, mescos cu tur otro instancia financiero, a duna tur espacio pa cada persona. Nan a sinta cu tur cliente, un pa un, pa nan por yuda nan miho con pa pasa door di e periodo aki, y tambe a duna periodo di gracia pa e clientenan por a pasa e dolor aki, den cual nos tur ta aden, señora Wever a menciona.
