ORANJESTAD (AAN) – Marc Figaroa, Director di Aruba Port Authority (APA), a hiba palabra den e conferencia di prensa,
yama pa Minister Dangui Oduber, titular di turismo, encuanto e proyectonan di renovacion y innovacion di Welcome Plaza y edificio di ex-DOW.
Figaroa a menciona cu e enfoke di APA ta pa sigui mehora e producto cu e ta ofrece na e turistanan di crusero, teniendo cuenta cu nan ta trece mas cu 800 mil pasahero y mas di 320 barco crusero pa aña.
APA kier tin un producto mas eleva pa ofrece pa ta mas competitivo cu otro destinacionnan den Caribe. Esaki ta exactamente e vision cu APA tin, ya cu esaki ta e prome impresion ora e turistanan crusero ta haya ora nan bishita Aruba y ora nan bay.
APA ta conta conhuntamente cu colaboracion di instancianan di gobierno, pa desaroya e proyecto aki cu sinergia.
Figaroa ta spera cu mas pronto posible por cuminza cu e down breaking di e proyecto di Welcome Festival Plaza. Nan ta den e fase di engineering aworaki, pa asina por cuminza cu e construccion mas pronto posible.
El a indica tambe cu ya ta den e fase final di negociacion pa e proyecto di ex-DOW. Para den e “gate 5” unda tur turista di crusero y tambe e tripulacion ta sali a bishita nos Isla, y locual por mira ta un edificio abandona. Pesey ta sumamente importante pa renova y eleva e edificio aki, y pon’e den un fachada moderno y mucho mas atractivo.
Director di APA a gradici gobierno y tur instancia envolvi, specialmente Departamento di Infrastructura y Planificacion (DIP), Minister di Turismo Departamento di Infrastructura, pa tur e colaboracion brinda pa por ta logrando e metanan aki.
